Gjatë natës, presidentja e Komisionit Evropian, Ursula von der Leyen, mirëpriti vendimin e Trump-it për pezullimin e tarifave, duke e cilësuar si “një hap të rëndësishëm drejt stabilizimit të ekonomisë globale”, raporton The Guardian.
Ajo gjithashtu riktheu idenë e një marrëveshjeje me tarifa zero me SHBA-në, duke shprehur shpresën për të arritur “një tregti pa fërkime dhe me përfitime të ndërsjella”.
Në komente të mëtejshme nga Zyra Ovale, Trump dukej se e lidhi sërish praninë e trupave amerikane në Evropë me rezultatet e bisedimeve tregtare me bllokun.
I pyetur nëse kishte ndonjë plan për të reduktuar praninë amerikane në kontinent, siç ishte raportuar nga mediat amerikane, ai tha:
“Po, mund të ndodhë. Dua të them, varet. Ne paguajmë për ushtrinë në Evropë. Ju e dini, nuk na rimbursojnë shumë… Kështu që do të jetë një nga gjërat që do të diskutojmë, edhe pse nuk ka lidhje me tregtinë, por mendoj se do ta bëjmë pjesë të saj, sepse ka sens, do të ishte mirë të përfshihej e gjitha në një paketë për çdo vend. Pra, është më e pastër”.
Komentet e tij do të shtojnë edhe më shumë spekulimet për të ardhmen e pranisë ushtarake amerikane, pasi Polonia dhe Rumania u alarmuan më herët këtë javë nga raportimet se SHBA po shqyrtonte tërheqjen e deri në 10,000 trupave nga Evropa Qendrore dhe Lindore.
Në komente aspak qetësuese gjatë natës, sekretari amerikan i mbrojtjes, Pete Hegseth, u tha gazetarëve se “personi i vetëm që do të marrë vendimin për strukturën e forcave të trupave amerikane në Evropë do të jetë presidenti Trump”.
“Ne do të vazhdojmë të kemi diskutime të vazhdueshme, përfshirë edhe në kontekstin e negociatave Ukrainë-Rusi, për atë se si duhet të jetë pozicionimi ynë ushtarak në kontinent që të adresojë më së miri interesat amerikane dhe të sigurojë ndarjen e barrës në Evropë”, shtoi ai.
Duke pasur parasysh kërkesat e kaluara të Rusisë për ‘demilitarizim’ në disa pjesë të Evropës, veçanërisht në ato që iu bashkuan NATO-s pas vitit 1997, këto komente nuk ka gjasa të qetësojnë shqetësimet rajonale, shkruan gazeta express.Komentet vijnë pikërisht kur përfaqësuesit e “Koalicionit të të Gatshmëve” po mblidhen në Bruksel për të diskutuar opsionet e ardhshme për Ukrainën.
