Ministrja në detyrë e Planifikimit Hapësinor dhe Mjedisit, Fitore Pacolli, ka reaguar për zhvillimet e fundit politike në vend, duke thënë se qytetarët e kanë bërë zgjedhjen e tyre në tri palë zgjedhje radhazi, përcjell KosovaPost.
Përmes një postimi, Pacolli ka deklaruar se kjo zgjedhje, sipas saj, është e qartë dhe se kryeministri në detyrë, Albin Kurti, gëzon mbështetjen dhe besimin e qytetarëve.
“Populli e ka bërë zgjedhjen e tij në tri palë zgjedhje radhazi dhe ajo zgjedhje është e qartë: Albin Kurti gëzon mbështetjen dhe besimin e qytetarëve”, ka shkruar Pacolli.
Ajo ka akuzuar opozitën se po përpiqet të imponojë një realitet tjetër nga ai që, sipas saj, ka dalë nga vota e qytetarëve.
“Vullneti i popullit nuk mund të zëvendësohet me pazare. Atë që nuk ua ka dhënë populli përmes votës, nuk mund t’ua japim ne përmes imponimit”, ka deklaruar Pacolli.
Në fund të reagimit, ajo ka përmbyllur me mesazhin: “VVazhdojmë!”
