Prokuroria Speciale ka ngritur aktakuzë ndaj katër personave, B.R., B.H., R.Q. dhe N.L., për veprën penale “Keqpërdorimi i pozitës apo autoritetit zyrtar”.
Sipas aktakuzës, gjatë periudhës nga 2 gushti 2017 deri më 26 nëntor 2020, në Prishtinë, të pandehurit, në cilësinë e personave zyrtarë të Ministrisë së Infrastrukturës, kanë tejkaluar kompetencat e tyre ligjore dhe nuk i kanë përmbushur detyrat zyrtare në lidhje me inicimin, prokurimin, menaxhimin, autorizimin, certifikimin dhe pagesën e kontratës publike “Mirëmbajtja e Urave në Rrugët Nacionale dhe Rajonale të Kosovës për vitet 2017–2019”.
Të pandehurit akuzohen se kanë vepruar në kundërshtim me Ligjin për Prokurimin Publik, Rregulloren dhe Udhëzimin Operativ për Prokurimin Publik, si dhe me Rregullën Financiare për Shpenzimet e Parasë Publike.
Sipas aktakuzës, ndonëse aktiviteti i prokurimit ishte iniciuar me vlerë të parashikuar prej 500 mijë eurosh, janë realizuar pagesa në shumën totale prej 5,377,058.07 eurosh.
Po ashtu, sipas Prokurorisë, janë nënshkruar dhe certifikuar raporte të punimeve me sasi shumëfish më të larta se ato të parapara në dosjen e tenderit, pa aneks-kontratë, pa zhvillimin e një procedure të re të prokurimit dhe pa verifikim të rregullt nga komisioni për pranimin e punëve.
Prokuroria Speciale i ka propozuar Gjykatës që, krahas dënimit kryesor, ndaj të pandehurve të shqiptohet edhe dënimi plotësues – ndalimi i ushtrimit të funksioneve në administratën publike ose në shërbimin publik.
