Presidenti rus, Vladimir Putin ka thënë se mendon që lufta në Ukrainë po mbaron – vërejtje që erdhën disa orë pasi ai ishte zotuar të mposhtte Ukrainën në paradën më të vogël të Ditës së Fitores në Moskë prej vitesh.
“Mendoj se çështja po merr fund”, tha Putin për luftën Rusi-Ukrainë, konfliktin më vdekjeprurës të Evropës që nga Lufta e Dytë Botërore. Ai tha se do të ishte i gatshëm të negocionte marrëveshje të reja sigurie për Evropën dhe se partneri i tij i preferuar negociues do të ishte ish-kancelari i Gjermanisë, Gerhard Schröder.
Duke folur të shtunën, Putin kritikoi ashpër mbështetjen perëndimore për Kievin, ndërsa dita e parë e armëpushimit Rusi-Ukrainë u shënua nga akuza të ndërsjella për shkelje, raporton Guardian.
“Ata [perëndimi] filluan ta përshkallëzonin konfrontimin me Rusinë, i cili vazhdon edhe sot e kësaj dite.
“Mendoj se [lufta] po shkon drejt fundit, por është ende një çështje serioze.”
“Ata kaluan muaj duke pritur që Rusia të pësonte një disfatë dërrmuese, që shtetësia e saj të shembej. Nuk funksionoi.”
“Dhe pastaj ata ngecën në atë gropë dhe tani nuk mund të dalin prej saj.”
Putin shtoi se ishte gati të takohej me Volodymyr Zelenskyn, në një vend të tretë, vetëm pasi të ishin zgjidhur të gjitha kushtet për një marrëveshje të mundshme paqeje – duke mbajtur qëndrimin e tij të zakonshëm për një takim me homologun e tij ukrainas.
“Kjo duhet të jetë pika e fundit, jo vetë negociatat”, tha ai.
