Qeveria e Kosovës ka mbajtur një mbledhje, në formë elektronike, sot, më 30.04.2026, në të cilën ka miratuar tetë vendime, transmeton KosovaPost.
Në njoftim thuhet se kanë emëruar bordin drejtues të Shërbimit Spitalor Klinik dhe Universitar të Kosovës, por nuk janë dhënë emrat e anëtarëve.
Në këtë mbledhje Qeveria e Kosovës i ka vazhduar mandatin Komisionit qeveritar për njohjen e statusit të ish të dënuarve dhe ish të përndjekurve politikë në afat kohor dyvjeçar.
Po ashtu është miratuar vendimi për emërimin e Grupit Koordinues për mbrojtje nga dhuna në familje, dhuna ndaj grave dhe dhuna me bazë gjinore.
Qeveria e Kosovës, po ashtu, ka:
– Miratuar Raportin Tremujor të Buxhetit për vitin 2026;
– Miratuar kërkesën e Ministrisë së Financave për plotësimin dhe ndryshimin e Vendimit të Qeverisë së Republikës së Kosovës Nr. 04/09, të datës 10.04.2026, për bartjen e shpenzimeve buxhetore nga ministritë amë në ministritë e reja të krijuara;
– Ndarë mjete buxhetore në vlerë prej 45,000.00€ (dyzet e pesë mijë euro) për Forumin Ekonomik të Vjenës, me qëllim të promovimit të Republikës së Kosovës;
– Miratuar kërkesën e Ministrisë së Shëndetësisë për pagesën e pesëdhjetë e dy (52) specializanteve lehona nga kategoria ekonomike subvencione dhe transfere nënprogramin “Aftësimi Specialistik” dhe EVM, në vlerë prej 475,051.50 euro, nga data 01.11.2025 deri më datën 31.12.2026.
