Qeveria ka miratuar shtesat e rrezikshmërisë për shtatë kategoritë e pjesëtarëve të Policisë së Kosovës.
Kryeministri, Albin Kurti tha sot se për kategorizimin dhe vlerën e shtesave janë dakorduar dje edhe me zëvendësdrejtorin e Policisë dhe pjesëtarët e Njësisë Speciale Intervenuese.
Kreu i Ekzekutivit potencoi se do vazhdojnë përkushtimin për përmirësimin e kushteve të PK-së.
“I njoftuam dhe siguruam ata se kategorizimi dhe vlerave e shtesave është bërë me kujdes të veçantë të shtuar duke marrë në konsideratë të gjithë faktorët rreth punës dhe përgjegjësive të tyre, por në të njëjtën kohë duke pasë parasysh edhe kufizimet të cilat ekzistojnë. Jemi dhe do të vazhdojmë të mbetemi të përkushtuar për përmirësimin e kushteve dhe pajisjeve të punës për Policinë e Kosovës, në mënyrë që krahas lehtësimit në punë të ndikojmë drejtpërdrejt edhe në uljen e rrezikut gjatë kryerjes së detyrave dhe përgjegjësive”, deklaroi ai.
Tutje, Kurti njoftoi se shtesat për muajt e deritanishëm do të ndahen në mënyrë retroaktive, me ç’rast pritet të përfitojnë afër 8 mijë zyrtarë.
“Shtesa për rrezikshmëri do të fillojë së aplikuari nga paga e muajit nëntor, kurse për muajt e deritanishëm, nga hyrja në fuqi e ligjit të ri për paga, ajo do të ndahet në mënyrë retroaktive. Me aprovimin e këtij vendimi, pritet të përfitojnë afër 8 mijë zyrtarë policorë, apo saktësisht 7 mijë e 991”, shtoi kryeministri Kurti.
Ndërkaq, Ministri i Financave, Hekuran Murati potencoi se Komisioni për kushte specifike të punës ka dorëzuar listat përfundimtare.
“Me ligjin për paga të sektorit publik ekzistojnë edhe kufizime sa i përket shtesave. Shtesat e miratuara janë në lartësi 7.6 milionë euro. Konsiderojmë që është bërë një punë e jashtëzakonshme në mënyrë që të sigurohemi që ka shpërndarje të drejtë”, ka thënë ai.
Qeveria i kishte prezantuar më 27 tetor shtesat për rrezikshmërinë për pjesëtarët e Policisë.
Për njësitë elitare, përkatësisht për Njësinë Speciale Intervenuese, Njësinë për Ndërhyrje të Shpejtë dhe Njësinë për Mbrojtje të Afërt, shtesat do të jenë prej 150 euro mbi pagën bazë.
Ndërkaq, për Njësinë për eksplozivët dhe deminim, Qeveria ka thënë se shtesa do të jetë në vlerë prej 120 eurosh.
Pjesëtarët e patrullave kufitare do të përfitojnë nga 100 euro në muaj, ndërsa pjesëtarë të hetuesisë nga 75 euro shtesë në muaj.
Ekipet reaguese dhe patrullat, që përbëjnë numrin më të madh të Policisë së Kosovës, do të marrin nga 60 euro shtesë në muaj, kurse policëve që angazhohen për sigurinë e objekteve dhe ata në menaxhim të operacioneve, do t’iu ndahen nga 50, përkatësisht 40 euro shtesë të rrezikshmërisë.
