Dëmet që po shkaktojnë erërat e forta në kryeqytet po bënë që qytetarët të ndihen të pasigurt. Në këtë mënyrë, ata po kërkojnë që në krye të Prishtinës të vijë një kryetar i ri. Derisa nga komuna thanë për televizionin se Prishtina është e sigurt dhe janë duke vazhduar inspektimin e ndërtesave.
E dëmet që shkaktojnë janë të mëdha.
Ashtu si javë më parë, edhe gjatë kësaj jave, një stuhi goditi kryeqytetin.
Të lënduar nuk pati, por dëmtimeve nuk u shpëtuan disa vetura.
Si pasojë e erërave të forta, një pjesë e çatisë së një ndërtese ra mbi tri vetura.
Shkak i kësaj, qytetarët nuk po ndihen të sigurtë.
“Nëse me një dimension e trajtojmë në aspektin e lirisë kemi një lloj sigurie, nëse e trajtojmë në aspektin e bazës materiale nuk ka siguri”, tha Sadri Kadriu – qytetar.
“Përpara ka qenë me standarde kanë qenë inxhinierë të cilët i kanë projektu ndërtimet tash secili ka mbërri në stilin e vet me ndërtu dhe era kur fryn normal që ka dëmtime”, tha qytetari Sabri Krasniqi.
Derisa ka të atillë që kërkojnë që në krye të Prishtinës të vijë dikush tjetër.
“Duhet patjetër një kryetar të ri të komunës me zgjedh jo një person i cili jep favore të mëdhaja arkitektëve me mijëra euro dhe nuk bëjnë asnjë punë”, tha Fatmir Rizaj – qytetar.
“Duhet me u bërë kontrollimi teknik i pari, i dyti i treti, krejt vërtetohen aty, nëse nuk është në rregull nuk bënë me pranu. Por po shkojnë qashtu, pi pranojnë pa kurrfarë nevoje, me interese të ndryshme”, tha një tjetër qytetar Shaip Gashi.
Derisa nga Komuna e Prishtinës thonë se janë duke vazhduar inspektimin e ndërtesave.
Drejtori për siguri dhe emergjenca, Lulzim Fushtica tha për televizionin se Prishtina është qytet i sigurt.
“Ne që një kohë të gjatë e kemi formu komisionin i cili është duke e bërë gjithë inspektimin e ndërtesave dhe duke e bërë vlerësimin e rrezikshmërisë”, tha drejtori për Siguri dhe Emergjenca, Lulzim Fushtiva.
Si pasojë e erërave të forta, para disa muajsh kishte rënë çatia e objektit të ri të Komunës së Prishtinës në Arbëri, e që e lënduar rëndë kishte mbetur një 23-vjeçare.
Deri tani, Kosova nuk ka ende një fond emergjent të krijuar për kompensim të dëmeve.
