Kryetari i AAK-së, Ramush Haradinaj ka vizituar sot Sindikatën e Bashkuar të Arsimit, Shkencës dhe Kulturës (SBAShK).
Pas takimit me kryetarin e SBAShK-ut, Rrahman Jasharaj, Haradinaj u shpreh se nuk e kupton “pafytyrësinë” e kryeministrit Albin Kurti dhe të ministres së Arsimit, Arbërie Nagavci, në çështjen e furnizimit të nxënësve me tekste shkollore.
Ai ka thënë të martën se Kurti e Nagavci do të duhej t’i kërkonin falje Kosovës, duke shtuar se prindërit do ta kenë të vështirë furnizimin me tekste për fëmijët e tyre.
“Këto kam ardhur me dy qëllime: të mësoj edhe më afër se si është gjendja me këtë situatën me tekstet, për shkak se informatat që i kemi marrë janë mjaft shqetësuese. Për fat të keq, ajo që mësova edhe nga biseda, është se është një situatë jo e mirë. Pra, nga praktika që tekstet do t’i kenë në shkolla, për prindërit do të jetë një luftë e vërtetë për t’i siguruar këto tekste, e përfshihet edhe problemi i kostos. Shumë prindër janë në vështirësi ekonomike. Mund të mos i kenë në prioritet tekstet…Nuk e kuptoj pafytyrësinë e Kurtit dhe të ministres, të paktën një kërkimfalje Kosovës. Kosova i paguan ata që në pranverë të kryhet çështja e teksteve për vjeshtë. Ata njerëz pa asnjë keqardhje dalin dhe i tallin të gjithë. Kjo situatë, në rrethana të njerëzve normalë, ndryshe duhet të ishte”, u shpreh Haradinaj.
Për situatën politike në Kosovë, Haradinaj është shprehur pro rrëzimit të Qeverisë Kurti nëpërmjet mocionit të votëbesimit.
“Shumë njerëz po i bëjnë thirrje qeverisë tonë të kthehet me aleatët, me Amerikën, me NATO-n me BE-në, por fatkeqësisht, Kurti dhe kjo qeveri ka zgjedhur një rrugë tjetër. Pasojat po i rriten Kosovës, do t’i rriten edhe parashikimet nuk janë të mira për asnjë temë. Mocioni është mënyra më e duhur edhe legjitime edhe demokraci. Opozita ka votën sa të iniciojë mocionin, pastaj do të duhej ndihma e deputetëve të tjerë. Shpresoj që në një rrethanë të caktuar do të arrijmë unitetin brenda opozitës. Por po, është opsion”, është shprehur Haradinaj.
E kryetari i SBASHK-ut, Rrahman Jasharaj deklaroi se procesi mësimor do të nisë më 1 shtator, por shtoi se shumë nxënës e mësimdhënës nuk do t’i kenë tekstet shkollore.
Jasharaj është shprehur se krahas gjendjes së krijuar, mësimdhënësit do të vazhdojnë “luftën me shkumës e shpuzë.
“Grevë nuk ka mësimi do të filloj të premten, por do të kemi nxënës dhe mësimdhënës pa tekste shkollore dhe nuk dihet se kur do të arrihet që të kompletohemi me to. Ne do të vazhdojmë betejën me shpuzë dhe shkumës. Urojmë që të mos humben shumë orë të mësimit”, tha Jasharaj.
Ai ka theksuar se mësimdhënësit janë të indinjuar me situatën e krijuar për tekstet shkollore, e prindërit “janë të nervozuar dhe të prekur”.
Kreu i SBASHK-ut ka theksuar se rreth 300 mësimdhënës kanë kërkuar pushim pa pagesë, e sipas tij, kjo mund të jetë bërë për të dalë jashtë vendit, në kërkim të një jetese më të mirë.
