Kreu i Komisionit të Politikës së Jashtme të Bundestagut dhe ish-ministri gjerman për Evropën, Michael Roth, ka thënë se aleancat me presidentin serb, Aleksandar Vuçiq, mund t’i minojnë aspiratat evropiane të Malit të Zi.
Sipas tij, Qeveria e Malit të Zi e ka mundësinë ta dëshmojë angazhimin e saj pro-evropian me një raport pozitiv për përmbushjen e standardeve të përkohshme.
“Është shqetësuese kur politikanët malazias kanë lidhje të ngushta me një lider që është dëshmuar se është partner jo i besueshëm për BE-në dhe rajonin. Aleanca të tilla mund të minojnë aspiratat evropiane të Malit të Zi. Udhëheqësit e vendit duhet të kenë prioritet angazhimin e tyre ndaj vlerave dhe parimeve demokratike të BE-së për të qëndruar në rrugën e duhur. Vendi tani ka shans real për të kapërcyer ndarjet, qofshin ato etnike, fetare apo politike, në përpjekje të përbashkët për t’u bashkuar me Bashkimin Evropian – ky shans është unik dhe i ndjeshëm ndaj kohës dhe nuk duhet të minohet”, ka thënë Roth në një intervistë dhënë mediumit malazias “Pobjeda”.
Ai tutje ka shprehur shqetësim edhe për ndikimin e fortë të Kishës Ortodokse Serbe në Mal të Zi, veçanërisht për shkak të pjesëmarrjes së saj në sistemin arsimor dhe ndikim e saj te të rinjtë, shkruan Rrugapress.al.“Në këtë kuptim, roli i Kishës në Mal të Zi është shqetësues. Jam dakord me vlerësimin e Parlamentit Evropian se Kisha Ortodokse Serbe vepron si një kanal i ndikimit rus dhe se paraqet kërcënim për integrimin evropian të Malit të Zi”, ka thënë ai.
