Sekretari i Shtetit Marco Rubio njoftoi të hënën se është administrator në detyrë i Agjencisë Amerikane për Zhvillim Ndërkombëtar, duke konfirmuar marrjen de-fakto të agjencisë humanitare nga Departamenti i Shtetit.
Rubio tha në një letër drejtuar ligjvënësve të hënën se ai ia kishte deleguar autoritetin e ushtruesit të detyrës së administratorit Pete Marocco, një i emëruar nga Trump, i cili shërbeu në USAID në mandatin e parë të presidentit dhe është akuzuar nga grupet e ndihmës dhe zyrtarët për shpërbërjen e qëllimshme të organizatës.
Marocco, i cili po shërben gjithashtu si kreu i ndihmës së huaj të Departamentit të Shtetit, hartoi direktivën për të ngrirë pothuajse të gjithë ndihmën e huaj. Një zyrtar i ndihmës tha se Marocco “e di se si funksionon sistemi dhe po e çmonton atë në çdo hap”.
Letra e Rubios për Komitetin e Punëve të Jashtme
Washington, DC 20515
I nderuar z. Kryetar,
Në përputhje me ligjin në fuqi, duke përfshirë seksionet 7063 dhe 7015 të Aktit të Buxhetit për Departamentin e Shtetit, Operacionet e Huaja dhe Programet e Ndërlidhura për vitin 2024 (Div. K, P.L. 118-47), siç është vazhduar nga Akti i Financimit të Përkohshëm për vitin 2025 (Div. A, P.L. 118-83), kjo letër shërben si njoftim dhe ju informon për synimin tonë për të nisur konsultime me ju mbi mënyrën e shpërndarjes së ndihmës së huaj nëpër botë përmes Agjencisë së Shteteve të Bashkuara për Zhvillim Ndërkombëtar (“USAID”).
Proceset aktuale të ndihmës së huaj janë jashtëzakonisht joefikase dhe nuk sjellin përfitime të konsiderueshme për popullin amerikan. USAID ka funksione të shumta që bien në konflikt, mbivendosen dhe janë të dyfishuara me ato të Departamentit të Shtetit. Për më tepër, sistemet dhe proceset e USAID-it nuk janë të mirëkoordinuara, të integruara apo të sinkronizuara, gjë që shpesh shkakton përçarje në politikën e jashtme dhe marrëdhëniet ndërkombëtare të Shteteve të Bashkuara. Kjo cenon aftësinë e Presidentit për të zbatuar politikën e jashtme.
Kam autorizuar Peter W. Marocco, Drejtorin e Ndihmës së Huaj dhe individin të cilit i kam deleguar autoritetin për të kryer detyrat e Zëvendës Administratorit të USAID, për të filluar procesin e shqyrtimit dhe të mundësisë së riorganizimit të aktiviteteve të USAID-it, me qëllim maksimizimin e efikasitetit dhe përafrimin e operacioneve me interesin kombëtar.
Ky shqyrtim dhe riorganizim i mundshëm do të përmirësojë ndjeshëm marrëdhëniet ndërkombëtare të Shteteve të Bashkuara dhe mund të përfshijë, ndër të tjera: pezullimin ose eliminimin e programeve, projekteve apo aktiviteteve; mbylljen ose pezullimin e misioneve apo posteve; mbylljen, riorganizimin, reduktimin ose ndryshimin e emrave të institucioneve, organizatave, zyrave apo qendrave; zvogëlimin e madhësisë së fuqisë punëtore në këto entitete; si dhe kontraktimin apo privatizimin e funksioneve apo aktiviteteve që aktualisht kryhen nga punonjësit federalë.
Departamenti i Shtetit dhe entitete të tjera përkatëse do të konsultohen me Kongresin dhe komitetet e duhura për të riorganizuar dhe për të përfshirë disa zyra, misione dhe departamente të USAID-it në strukturën e tyre. Këto konsultime do të zhvillohen në emër të drejtuesve të këtyre entiteteve, sipas udhëzimeve të Presidentit,s hkruan euronews.al.Në bashkëpunim me Kongresin, USAID mund të zhvendosë, riorganizojë dhe integrojë disa misione, zyra dhe departamente në Departamentin e Shtetit, ndërsa pjesa tjetër e Agjencisë mund të shpërbëhet në përputhje me ligjin në fuqi.
