Policia e Kosovës në bashkëpunim me Prokurorinë ka sekuestruar rreth 50 kamera të vendosura ilegalisht në komunat me shumicë serbe, Kllokot, Partesh dhe Ranillug. Lajmin për mediet vendore e ka konfirmuar zëdhënësi i Policisë së Kosovës për Rajonin e Gjilanit, Valon Osmani.
“Drejtoria rajonale e Policisë Gjilan me datën 21.12.2023 në koordinim e Prokurorinë e Shtetit ka zbatuar urdhëresën e Gjykatës Themelore në Gjilan në bazë të së cilës ka sekuestruar kamerat që janë vendosur në vende publike në komunat e Kllokot, Partesh dhe Ranillug. Sekuestrimi i kamareve është bërë për shkak të dyshimit të arsyeshëm për kryerjen e veprës penale “Fotografimi dhe incizimet e tjera të paautorizuara”, ka thënë ai.
Ky aksion i Policisë së Kosovës në Anamoravë, ka ardhur një ditë pasi Policia e Kosovës në Mitrovicën e Veriun ka konfiskuar një sirenë dhe 5 zmadhues zëri, që ishin përdorë nga serbët për protesta të dhunshme në veri.
