Mbi 10 mijë vetura të paregjistruara po vazhdojnë të qarkullojnë në veriun e vendit. Por nga e hëna e deri më 30 shtator është afati kur pronarët e tyre duhet të aplikojnë për t`i regjistruar dhe vendosur tabelat e Kosovës. Disa banorë serb të veriut vazhdojnë të rezistojnë duke thënë se refuzojnë të zbatojnë një vendim të tillë.
Mirëpo autoritetet e Kosovës thonë se vendimi është i papërsëritshëm. Që nga e hëna banorët e veriut duhet te fillojnë riregjistrimin e këtyre veturave, nëse dëshirojnë të lëvizin brenda shtetit të Kosovës.
Një vendim të tillë, ekzekutivi kosovar e mori saktësisht para një muaji, bazuar ne marrëveshjen e arritur në Bruksel që nga viti 2011, marrëveshje e cila nuk u zbatua asnjëherë, ndonëse nga ajo kohe kanë kaluar afro 11 vite.
Mbi 10 mije vetura te regjistruara nga Ministria e Punëve të Brendshme e Serbisë vazhdojnë të qarkullojnë në Veri te Mitrovicës. Këto targa duhet te nderohen deri me 30 shtator, nëse banorët dëshirojnë te qarkullojnë brenda territorit të Republikës së Kosovës.
Banorët e kësaj anë janë të ndarë në qëndrime nëse dëshirojnë apo jo t’i ndërrojnë targat e veturave. Disa nga banorët e intervistuar vazhdojnë të flasin me mendësinë e së kaluarës.
Pavarësisht se disa banorë të veriut shprehen se një vendim të tillë nuk do ta zbatojnë asnjëherë, Jeta Tela, shefe e Kabinetit të ministrit te brendshëm Xhelal Svecla tha se vendimi për riregjistrim të targave është i papërsëritshëm dhe do të fillojë të zbatohet nga e hëna deri më 30 shtator të këtij viti.
Tela flet edhe për lehtësirat për riregjistrtim të veturave. Mirëpo për dallim nga thirrjet e institucioneve të Kosovës, ditë më parë në veri të vendit nëpër vetura janë vendosur afishe të cilat bënin thirrje për të mos i regjistruar.
Ne anën tjetër, sekretari i shtetit ne Ministrinë e Punëve të Jashtme të Serbisë Nemanja Stanoviq në një deklaratë për RTK-në ka thënë se ky vendin është i njëanshëm, duke i bërë thirrje bashkësisë ndërkombëtare ta parandalojë siç u shpreh ai, tensionimin e situatës.
“Për shkak të gjithë kësaj, ekziston frika se këto masa të reja të njëanshme realisht mund të çojë në një rritje serioze të tensioneve në Kosove. Ne kemi një parandjenjë dhe jemi vërtet të frikësuar, duke parë vetëm efektet dhe lëvizjet konkrete të institucioneve të udhëhequra nga Albin Kurti, se me sa duket ai beson se ekzistojnë rrethana të favorshme gjeopolitike për të, në të cilat ai me vetëdije dhe me plane shkon në drejtim të një lloj përshkallëzimi.
Pikërisht për këtë apelojmë çdo ditë te përfaqësuesit të bashkësisë ndërkombëtare, veçanërisht vendeve të Kuintit, që janë edhe mbështetësit më të mëdhenj të Prishtinës, që të marrin masa aktive për te dekurajuar Albin Kurtin nga besimet e tij dhe në përputhje me politikat e tyre të tregojnë shumë qartë dhe me zë të lartë se nuk do të tolerohet asnjë përshkallëzim dhe rritje tensioni”.
Pavarësisht deklarimeve të zyrtarit të Serbisë, edhe vetë Bashkimi Evropian si ndërmjetësues i dialogut Kosovë-Serbi, ka thënë se Kosova ka të drejtë t’i zëvendësojë targat me akronimet e qyteteve.
Banorët e veriut të ndarë në qëndrime nëse do të regjistrojnë veturat e tyre me targa të Kosovës + Autoritetet e Kosovës të vendosura në zbatimin e vendimit nga 1 shtatori, Serbia e konsideron vendimin të njëanshëm./rtk