Shtetet e Bashkuara të Amerikës (SHBA) i kanë futur në listë të zezë 10 individë, duke shpallur rundin e radhës së sanksioneve ekonomike në Ballkan.
Në ueb-faqen zyrtare të Thesarit amerikan, individët e sanksionuar janë nga Bosnjë-Hercegovina, Mali i Zi, Maqedonia e Veriut dhe Serbia.
Sipas SHBA-së, Savo Cvijetinoviq është anëtar i bordit ekzekutiv të partisë së presidentit Milorad Dodik, Aleanca e Social Demokratëve të Pavarur. Ai gjithashtu është përfaqësues i kompanisë BN Inzinjering, që në krye ka një ish-shef të forcave ajrore ruse. Kjo kompani ka lehtësuar transferimin e paligjshëm të motorëve të helikopterëve të prodhuar në Ukrainë në Rusi nëpërmjet Bosnjës
Petar Djokiq është aktualisht ministër i Industrisë, Energjisë dhe Minierave. Në 2017-n, Djokiqi pati nënshkruar një marrëveshje me ministrin kroat të Energjisë dhe Mbrojtjes së Ambientiit, për të ndërtuar një tubacion nga Kroacia në rafinerinë Bosanski Brod, që është në pronësi të një kompanie ruse.
Zbatimi i kësaj marrëveshjeje konsiderohet kërcënim për zbatimin e marrëveshjes së Dejtonit. Sanksionimi i Djokiqit është sinjal i qartë se SHBA-ja nuk toleron sjelljen anti-Dejton.
Djokiqi përflitet si bashkëpunëtor ose i përfshirë direkt në pengimin e çdo marrëveshjeje të sigurisë, paqes e bashkëpunimit ose njohjes reciproke në vendet e Ballkanit Perëndimor.
Dushko Peroviq është në krye të Zyrës së përfaqësimit të Republikës Serbe në Moskë. Ai ka qenë pjesë përbërëse e organizimit të ndërveprimeve mes presidentit Milorad Dodik dhe partisë së tij, SNSD. Peroviq ka lobuar vazhdimisht për takime mes Dodikut dhe presidentit rus, Vladimir Putin.
Miograd Daka Davidoviqi ka shpëlarë para për dekada për sindikata kriminale, duke forcuar ndikimin e tij në bizneset e krimit në cigare, vaj dhe armatime të kontrabanduara në Mal të Zi. Aktivitetet korruptive mundësonin përpjekjet ruse për të kompromentuar pavarësinë e institucioneve demokratike dhe të gjyqësorit, duke përfshirë përpjekjet për të ndikuar në rezultat e zgjedhjeve.
Ai gjithashtu është i përfshirë në skandalin që çoi në arrestimin e sekretarit të Përgjithshëm të Sigurisë të Qeveirsë së Maqedonisë së Veriut. Dyshohet edhe për takime me ish-kryeministrin Zoran Zaev.
Branislav Brano Miçunoviq
Ka qenë figurë udhëheqëse e krimit të organizuar në Mal të Zi për dekada, që daton nga epoka e ish-Jugosllavisë. Ai është i njohur për ndërmarrjen e tij të paligjshme të kontrabandës së cigareve që korruptoi dhe minoi pavarësinë e institucioneve demokratike të Malit të Zi.
Sergey Samsonenko është edhe shtetas i Rusisë dhe i Maqedonisë së Veriut, si dhe biznesmen i pasur. Mes 2017-s e 2018-s, Samsonenko dhe bashkëshortja e tij, Irinia Samsonenko, blenë tokë në mënyrë të paligjshme dhe dyshohen për përfshirje në korrupsion direkt në Ballkanin Perëndimor. Pasuria e tyre konsiderohet miliardëshe.
Ndikimi rus në Ballkanin Perëndimor është thellësisht i ndërthurur me korrupsionin dhe retorikën politike ekstremiste, që kërcënojnë sundimin e ligjit, stabilitetin dhe sovranitetin e rajonit.
Si pasojë e kësaj, SHBA-ja ka sanksionuar edhe Misha Vaçiqin, kryetarin e Partisë së Djathtë në Serbi. Në 2022-n, ai shërbeu edhe si vëzhgues në referendumin e rremë të Rusisë për aneksimin e supozuar të rajoneve të okupuara nga Rusia në Ukrainë. Vaçiq pretendonte se ishte vëzhgues ndërkombëtar e me ftesë të presidentit Vladimir Putin, kishte përkrahur aneksimin e supozuar të këtyre rajoneve nga Rusia.
Ai po akuzohet nga SHBA-ja si bashkëpunëtor.
Nenad Popoviq
Ai ka shërbyer në Serbi si ministër në periudhën 2017-2022 dhe ishte themelues i Partisë së Popullit.
Popoviq numëron kompani dhe biznese në Serbi dhe Rusi, ndërsa nga viti 1990 kishte përdorur bizneset e tij për t’u lidhur me liderët e Kremlinit.
Lidhjet e tij me Kremlinin zyrtar vazhdojnë edhe sot.
