Paneli Zgjedhor për Ankesa dhe Parashtresa (PZAP) ka shqiptuar gjoba në vlerë rreth 40 mijë euro ndaj disa partive politike për shkelje të rregullave zgjedhore gjatë fushatës për zgjedhjet lokale që do të mbahen më 12 tetor.
Sipas të dhënave të publikuara në faqen zyrtare të PZAP-së, gjobat janë vendosur për periudhën që nga fillimi i fushatës zgjedhore deri të premten e kaluar, kur është marrë edhe vendimi më i fundit.
Arsyet e ndëshkimeve lidhen me shkelje të ndryshme të Kodit të Mirësjelljes dhe rregullave të tjera që rregullojnë sjelljen e subjekteve politike gjatë fushatës.
Në mesin e partive të gjobitura janë LVV-ja PDK-ja, LDK-ja, AAk-ja, NDS dhe Iniciativa Qytetare për Skenderaj. Kjo e fundit ka marrë gjobën më të lartë, me një shumë prej 10 mijë eurosh, të shqiptuar në dy raste të ndara.
Sipas PZAP-së, gjoba është rezultat i shkeljeve të dokumentit që synon të sigurojë një ambient zgjedhor demokratik dhe të qetë, duke vendosur standarde për sjelljen e partive, kandidatëve dhe mbështetësve të tyre gjatë fushatës.
Institucioni ka bërë të ditur se do të vazhdojë të mbikëqyrë nga afër zhvillimet në terren dhe do të ndërmarrë masa për çdo shkelje që cënon rregullsinë e procesit zgjedhor.
