Një ditë tjetër e zezë, një tjetër humbje dhe Champions League që largohet. Rasti për të shkurtuar distancën me Juven, e katërta në renditje, i shpëton një Milani të dobët dhe Sergio Conceição, në fund të ndeshjes, nuk mund të jetë aspak i lumtur, aq më tepër që ka disa episode që nuk e bindin trajnerin kuqezi: në golin e barazimit të Castros (prekja me dorë e Fabbianit, që praktikisht u bë një asist) dhe në atë të golit të dytë të shënuar nga Ndoye (topi që duket se kishte dalë jashtë para krosimit të Cambiaghi-t).
“Kishte një faull të qartë me dorë në golin e tyre të parë dhe në të dytin pashë që topi kishte dalë nga vija anësore. Nuk ma thanë, e pashë vetë. Duhej të bënim më shumë, por të gjitha episodet negative për ne kthehen në pozitive për kundërshtarin. Duhet të kuptojmë çfarë kemi gabuar, por kemi bërë edhe gjëra të mira. Kishte gabime nga ana jonë, por edhe nga një tjetër skuadër (arbitrat?), që rezultuan vendimtare. Nuk është vetëm gjyqtari fajtor për këtë humbje, e marr unë përgjegjësinë i pari, por këto gjëra ndodhin gjithmonë.”
Nga humbja ndaj Bologna-s tek e ardhmja e tij, hapi është shumë i vogël… “Çdo ditë flitet për situatën time dhe nuk është e drejtë. Por unë jam i qetë sepse situata është e thjeshtë: nëse më thonë që nuk duhem më, marr valixhet dhe largohem, nuk dua asnjë euro më shumë. Kam pothuajse 100 ndeshje në Champions, por çdo ditë kënaqen duke folur për mua. Dëgjoj shumë gjëra të këqija për veten time, si të kisha ardhur nga hiçi, ndërkohë që për 5 vite gjithmonë kam eliminuar skuadra italiane më të forta se Portoja ime… Kam nevojë për pak respekt si person, më falni për këtë shpërthim.”s.n.
