Muhamet e Fatimja Bajrami me katër fëmijët e tyre para 30 viteve ishin zhvendosur nga Lugina e Preshevës për të jetuar në Prishtinë. Të gjithë janë pajisur me nënhtetësi të Kosovës, pos bashkëshortes. Arsyet e refuzimit janë të ndryshme nga familja dhe institucionet përgjegjëse. Ta ndjekim reportazhin e Kanal 10 për historinë e familjes Bajrami.
Këtë vit Muhamet Bajrami së bashku më bashkëshorten e tij Fatimja Bajrami, numërojnë plot 30 vite që janë zhvendosur nga Medvegja për të jetuar në Kosovë.
Pas 16 viteve jetesë, në vitin 2009, kryefamiljari kishte aplikuar për nënshtetësi të Kosovës.
Fitues të nënshtetësisë u bë ai dhe katër fëmijët, por jo edhe bashkëshortja Fatimja.
E dhjetë vite më vonë ajo përsëri kishte aplikuar për nënshtetësi, pasi jetesa pa dokumente i ishte vështirësuar edhe më shumë.
Por, edhe pas një tentimi të dytë, Fatimja nuk arriti të jetë përfituese e nënshtetësisë, pasi i janë kërkuar dëshmi për martesën etyre
Bashkëshorti i saj, Muhamet Bajrami e quan padrejtësi.
E këtë kërkesë të Ministrisë së Punëve të Brendshme nuk po e shohin të arsyeshme as noterët, të cilët thonë se kërkesa e këtij dokumenti është i panevojshëm derisa ekziston certifikata e martesës.
Për këtë cështje, çifti i ishte drejtuar edhe Avokatit të Popullit.
E në faqen zyrtare të ministrisë ku njoftohen qytetarët për përmbushje të kritereve dhe dokumentacionet e nevojshme, nuk është i shënuar edhe ky dokument.
Derisa nga Ministria e Punëve të Brendshme kanë thënë se zonja në fjalë ka aplikuar vetëm për lejë qëndrim të përhershëm, por jo edhe për nënshtetësi.
“Ju njoftojmë se znj. Fatimja Bajrami nuk ka parashtruar kërkesë për fitimin e shtetësisë, por ka aplikuar për fitimin e lejes së qëndrimit të përhershëm. Divizioni për të Huaj, i cili funksionon në kuadër të Departamentit për Shtetësi Azil dhe Migrim, pasi që ka shqyrtuar kërkesën e parashtruar nga pala, ka vërtetuar se shtetasja e huaj në dosjen e saj, nuk ka arritur të dëshmoj dhe të plotësoj kriteret që kërkohen konform legjislacionit në fuqi, konkretisht, nuk dëshmon që jeton në Republikën e Kosovës së paku 5 vite pandërprerë, çoftë edhe me dokumente të tjera, përveç që asnjëherë nuk ka pasur as leje qëndrim të përkohshëm”, thuhet në përgjigjen e Ministrisë së Punëve të Brendshme.
Vetëm në vitin 2022 janë mbi 4 mijë qytetarë që kanë hequr dorë nga nënshtetësia e Kosovës.
