Një studim i ri nga Universiteti Monash në Australi sugjeron se konsumimi i vezëve mund të lidhet me një rrezik më të ulët të vdekjeve të shkaktuara nga sëmundjet kardiovaskulare tek të moshuarit.
Studiuesit ndoqën mbi 8,700 persona të moshës 70 vjeç e lart dhe zbuluan se ata që konsumonin një deri në gjashtë vezë në javë kishin një rrezik 15% më të ulët të vdekjes nga çdo shkak dhe një rrezik 29% më të ulët të vdekjes nga sëmundjet kardiovaskulare, krahasuar me ata që hanin vezë dy herë në muaj ose më pak.
“Rezultatet tona sugjerojnë se ngrënia e deri në gjashtë vezë në javë mund të zvogëlojë rrezikun e vdekjes nga të gjitha shkaqet dhe sëmundjet kardiovaskulare tek të moshuarit,” tha Holly Wild, pedagoge në epidemiologji dhe mjekësi parandaluese në Universitetin Monash. Ajo shtoi se këto gjetje mund të ndihmojnë në përmirësimin e udhëzimeve dietike për këtë grupmoshë.
Vezët janë një burim i pasur proteinash dhe lëndësh ushqyese thelbësore si vitaminat B, acidet yndyrore të pangopura, vitaminat E, D, A dhe K, si dhe minerale të ndryshme. Megjithatë, për shkak të përmbajtjes së tyre të kolesterolit, ato kanë qenë prej kohësh subjekt debatesh lidhur me ndikimin e tyre në shëndetin e zemrës.
Studiuesit gjithashtu analizuan efektin e konsumimit të vezëve tek personat me dislipidemi (kolesterol të lartë) dhe zbuluan se ata që hanin vezë rregullisht kishin një rrezik 27% më të ulët të vdekjes nga sëmundjet kardiovaskulare, krahasuar me ata që konsumonin vezë rrallë ose aspak.
Udhëzimet dietike për konsumin e vezëve ndryshojnë nga vendi në vend, por një rishikim i Shoqatës Amerikane të Zemrës i publikuar në vitin 2020 sugjeron se individët e shëndetshëm mund të konsumojnë deri në shtatë vezë në javë pa rrezik për shëndetin.
