Konflikti në Lindjen e Mesme po shndërrohet në një luftë rajonale. Kryeministri i Izraelit, Benjamin Netanyahu, zotohet se do të hakmerret ashpër kundër Iranit, pas sulmit me rreth 200 raketa balistike.
“Irani bëri një gabim shumë të madh dhe do të paguajë për të. Regjimi në Irani nuk e kupton përkushtimin tonë për ta mbrojtur vetën dhe bindjen tonë për t’u hakmarrë ndaj armiqve. Sinëar dhe Deif nuk e kuptuan këtë, po ashtu edhe Nasrallah apo Mohsen-i. Dukshëm, ata në Teheran nuk e kuptojnë gjithashtu. Por ata do ta kuptojnë herët a vonë. Ne do të vazhdojmë me rregullin që kemi vendosur: kush na sulmon, ne do ta sulmojmë”, tha Netanjahu.
Irani tha se breshëria e sulmeve ishte në përgjigje të “akteve agresive” të Izraelit, duke përfshirë vrasjen e liderit të Hezbollahut, Hassan Nasrallah. Shumica e raketave u rrëzuan nga mbrojtja ajrore dhe trupat amerikane në rajon, shkruan A2.
Një palestinez u vra në Bregun Perëndimor, ndërsa mbetjet e raketave dëmtuan një shkollë në Izraelin qendror dhe një restorant në Tel Aviv.
Irani ka kërcënuar se do të shënjestrojë të gjithë infrastrukturën e Izraelit nëse hakmerret, me mediat ndërkombëtare që raportojnë se Teherani ka bërë gati me qindra raketa të tjera dhe ka mbyllur për disa ditë hapësirën ajrore.
Ndërkohë, Izraeli thotë se po dërgon forca shtesë në operacionin e tij tokësor brenda Libanit, i cili nisi në fillim të kësaj jave. Nuk kanë munguar as sulmet ajrore, me shpërthime të raportuara në Bejrut.
Nga ana tjetër, Hezbollahu thotë se zmbrapsi një sulm tokësor izraelit në Liban të mërkurën dhe ka vazhduar të gjuajë raketa në Izrael. (A2 Televizion)
