Vendet e Ballkanit Perëndimor janë evropiane dhe duhet t’i fusim, siç është e drejta e tyre, sa më shpejt që të jetë e mundur në Bashkimin Evropian, u shpreh ministri i Jashtëm italian, Antonio Tajani.
”Në këtë drejtim, megjithatë, Evropa nuk duhet të mbajë një qëndrim armiqësor; në procedurat e anëtarësimit duhet të jemi rigorozë, por jo pengues. Nëse e vonojmë procesin me një qëndrim burokratik, rrezikojmë ta humbasim politikisht Ballkanin, sepse ka interesa të ndryshme nga Rusia, Kina dhe vendet arabe. Për Italinë kjo është një përparësi politike”, tha ai duke folur në dialogun me temë ”Përshpejtimi i integrimit të Ballkanit Perëndimor, një zgjedhje strategjike për të ardhmen e Evropës”.
Në tryezën e rrumbullakët mori pjesë edhe ministri i Jashtëm i Malit të Zi, Enver Ibrahimoviq, në kuadër të Forumit Vjetor të Observatorit për Evropën Juglindore, në Trieste.
Tajani kujtoi se ”si Itali ne investojmë; kemi një prani të fortë në Mal të Zi, mes Kosovës dhe Serbisë, në Bosnjë-Hercegovinë dhe po punojmë që, në kohën më të shkurtër të mundshme, vendet e Ballkanit Perëndimor të mund të bëhen pjesë e Evropës sonë. Kjo do t’i mundësojë Perëndimit të jetë më i fortë”.
Ministri Tajani bëri gjithashtu një referencë ndaj korridorit IMEC, i cili, sipas tij, ”do t’u mundësojë të gjithë vendeve të Ballkanit dhe Evropës Qendrore të kenë rritje ekonomike”.
Megjithatë, duhet ”të punojmë për të ulur tensionet në Ballkan”, në mënyrë që ”të ketë stabilitet”, i cili mundëson ”rritjen ekonomike”.
”Mbrojtja evropiane nuk është kundër NATO-s, por është shtylla evropiane e NATO-s”, shtoi Tajani.
Në lidhje me konfliktet në Ballkan, Tajani theksoi se ”sapo këto vende të jenë në Bashkimin Evropian, edhe konfliktet do të priren të zbuten”.
