Sekretari amerikan i Mbrojtjes nga administrata Trump ka postuar sot një fotografi në llogarinë e tij në platformën X, ku shfaqet një tatuazh “kafir” në krahun e tij, të shkruar në arabisht, poashtu ka kryqin e famshëm historik “Kryqi i Jerusalemit” në gjoks, i lidhur me kryqëzatat në mesjetë. Në krahun e tij ai mban mbishkrimin “Deus vult”, një slogan latin që do të thotë “Zoti do”, të cilin ushtarët e Kryqëzatës së Parë në 1096 e përsëritën ndërsa vrisnin muslimanët, duke pretenduar se ajo që ata po bënin ishte vullneti i Zotit.
Vëzhgues të vëmendshëm vunë re një tatuazh të ri në trupin e Sekretarit të Mbrojtjes, Pete Hegseth, gjatë një vizite të tij me trupat amerikane në bazën ushtarake Joint Base Pearl Harbor-Hickam. Tatuazhi përmban fjalën arabe “kafir” (كافر), e cila në Kuran nënkupton “mohues” ose “jobesimtar”.
Ky zbulim vjen në një moment të tensionuar për Hegseth, i cili është përballur me thirrje për dorëheqje pas raportimeve se kishte ndarë në një grup të aplikacionit Signal planet e sulmeve në Jemen me zyrtarë të administratës Trump. Hegseth e ka mohuar përfshirjen e informacioneve të klasifikuara në këtë bisedë dhe aktualisht ndodhet në një turne në Guam dhe Hawaii për të vizituar trupat amerikane.
Tatuazhi “kafir” është vendosur poshtë një tjetër tatuazhi të tij që përmban shprehjen “Deus Vult”, një slogan i Kryqëzatave mesjetare. Aktivistë të ndryshëm e kanë dënuar këtë si një tjetër shfaqje të Islamofobisë nga një zyrtar i lartë i Pentagonit.
“Kjo nuk është thjesht një zgjedhje personale, por një simbol i qartë i Islamofobisë nga njeriu që mbikëqyr luftërat amerikane”, shkroi aktivistja pro-palestineze Nerdeen Kiswani në rrjetet sociale.
Gazetari Tam Hussein tha se ky tatuazh do të interpretohet në botën myslimane si një deklaratë armiqësie ndaj tyre.
Megjithatë, disa e mbrojtën tatuazhin, duke e konsideruar si një simbol të përdorur gjerësisht nga veteranët që kanë shërbyer në Lindjen e Mesme. “Kjo fjalë është e njohur mes ushtarëve dhe simbolizon sfidën kundër terroristëve islamikë”, shkroi një përdorues në rrjetin social ‘X’.
Nuk është e qartë nëse ky tatuazh është i ri, apo thjesht nuk ishte vënë re më parë për shkak të pozicionit të tij në trupin e Hegseth. Departamenti i Mbrojtjes nuk ka komentuar mbi këtë çështje.
Ky nuk është rasti i parë që tatuazhet e Hegseth shkaktojnë debat. Më herët, një kryq i Jerusalemit në kraharorin e tij ngjalli polemika pasi Hegseth u nominua si Sekretar i Mbrojtjes, me demokratët që e cilësuan atë si një simbol ekstremist të së djathtës kristiane. Ai ka pohuar se ky tatuazh ishte arsyeja pse iu ndalua pjesëmarrja në misionin e sigurisë për inaugurimin e Presidentit Joe Biden, shkruan A2CNN.Me më shumë se një duzinë tatuazhesh në krahun e djathtë dhe gjoksin e tij, Hegseth vazhdon të jetë një figurë e diskutueshme në politikën amerikane.,
