Presidenti amerikan, Donald Trump, deklaroi se Ukraina ka nevojë për një president të ri, duke akuzuar udhëheqësin ukrainas, Volodymyr Zelensky, se nuk ka bërë përpjekje të mjaftueshme për t’i dhënë fund pushtimit rus. Trump e fajësoi gjithashtu Zelenskyyn për rritjen e çmimeve të karburantit dizel në Shtetet e Bashkuara.
“Unë sugjeroj që ata të zgjedhin një udhëheqës të ri, i cili mund të arrijë një marrëveshje, sepse ai ka mundur të bëjë shumë marrëveshje, por për disa arsye nuk i bën kurrë”, u tha Trump gazetarëve në Shtëpinë e Bardhë të shtunën, para se të nisej për në Tennessee.
Deklarata u përshëndet nga Kirill Dmitriev, i dërguari special i Kremlinit për bashkëpunimin ekonomik dhe negociatori kryesor ekonomik i presidentit rus, Vladimir Putin. Ai i cilësoi komentet e Trumpit si “ikonike dhe historike”.
“Presidenti Trump u bashkohet shumë të tjerëve që besojnë se Ukraina ka nevojë për një udhëheqje të përqendruar te paqja, e jo te nxitja e luftës nga Zelenskyy”, shkroi Dmitriev në rrjetin social X, transmeton Telegrafi.
Deklaratat e Trumpit vijnë pas kritikave të ashpra të Zelenskyt ndaj marrëveshjes mes Uashingtonit dhe Moskës për blerjen e karburantit dizel rus, e cila synon të ndihmojë në përballimin e çmimeve të larta të karburanteve në prag të zgjedhjeve të mesmandatit në SHBA.
Edhe zyrtarë evropianë kanë shprehur shqetësim për marrëveshjen, duke paralajmëruar se ajo do të ndihmojë në financimin e luftës së Rusisë kundër Ukrainës.
Pas bisedimeve me Putinin, Trump njoftoi se Rusia do të furnizonte menjëherë tregjet amerikane dhe globale me mbi 300 mijë tonë karburant dizel, ndërsa 500 mijë tonë të tjerë do të dërgoheshin gjatë muajit nëntor.
Zelenskyy e cilësoi këtë vendim si një “dhuratë për Putinin”, duke thënë se ai “nuk do të sjellë paqe dhe as ndonjë përfitim për botën e qytetëruar”.
“Lejimi i Rusisë për të shitur produkte të naftës është një investim në një luftë që duhet të përfundojë, e jo të zgjatet. Ajo që nevojitet është një ulje reale dhe reciproke e tensioneve me Rusinë”, deklaroi presidenti ukrainas.
Çmimet e naftës dizel në SHBA janë rritur që nga 28 shkurti, kur Shtetet e Bashkuara dhe Izraeli nisën një sulm të përbashkët ndaj Iranit. Luftërat në Iran dhe Ukrainë kanë kontribuar në krizën globale të energjisë, por Trump ka fajësuar kryesisht Zelenskyyn për rritjen e çmimeve të karburantit në SHBA.
Presidenti amerikan e ka nxitur më herët udhëheqësin ukrainas të ndalë sulmet ndaj rafinerive ruse të naftës dhe infrastrukturës tjetër kritike, duke pretenduar se këto goditje po përkeqësojnë mungesën globale të karburantit.
“Ai, Zelensky, dëshiron t’i krijojë probleme botës. Dëshiron t’u krijojë probleme fermerëve dhe blegtorëve tanë, për shkak të karburantit dizel”, tha Trump të shtunën.
“Ne i thamë: ‘Bëj çfarë të duash, por mos i godit furnizimet me dizel, sepse ekziston një problem i madh’. E çfarë bën ai? Shkon dhe i godet”, shtoi presidenti amerikan.
Ndërkohë, miratimi publik për Trumpin ka rënë ndjeshëm gjatë mandatit të tij të dytë. Sipas një sondazhi të realizuar muajin e kaluar nga Associated Press dhe Qendra NORC për Kërkime mbi Çështjet Publike, 71 për qind e të rriturve amerikanë nuk e miratonin mënyrën se si ai po e trajtonte çështjen e Iranit. /
