Presidenti amerikan Donald Trump ka deklaruar se administrata e tij po shqyrton mundësinë e aneksimit të Venezuelës, duke thënë për televizionin Fox News se po e konsideron “seriozisht” idenë që vendi i Amerikës Latine të bëhet shteti i 51-të i SHBA-së.
Në një intervistë për John Roberts të Fox Neës, Trump deklaroi se dëshira e tij për të shtuar një tjetër yll në flamurin amerikan lidhet me sasitë e rezervave të naftës që zotëron Venezuela, për të cilat kreu i Shtëpisë së Bardhë tha se vlejnë 40 trilionë dollarë.
Trump ka bërë edhe më herët deklarata për aneksimin ose marrjen nën kontroll të territoreve të tjera sovrane, përfshirë Kanadanë, Groenlandën, Panamanë dhe Kubën. Komentet e tij të fundit vijnë pas operacionit ushtarak të zhvilluar në janar për arrestimin e ish-presidentit venezuelian Nicolás Maduro dhe bashkëshortes së tij, Cilia Flores.
Sipas raportimeve, zyrtarë të Shtëpisë së Bardhë kanë zhvilluar kontakte të vazhdueshme me autoritetet në Karakas për marrëveshje me kompani amerikane të energjisë dhe minierave, ndërsa SHBA-ja synon forcimin e lidhjeve me presidenten e përkohshme Delcy Rodríguez. Kjo e fundit deklaroi se vendi i saj nuk ka plan të bëhet pjesë e Shteteve të Bashkuara, duke theksuar se venezuelianët duan pavarësinë dhe sovranitetin e tyre.
Pavarësisht deklaratave të tij, Trump nuk mund ta shpallë ligjërisht Venezuelën si shtetin e 51-të të SHBA-së pa miratimin e Kongresit amerikan dhe pa pëlqimin e vetë Venezuelës. Ndërkohë, SHBA-ja ka rritur praninë ushtarake në rajonin e Karaibeve, duke dislokuar një nga flotat më të mëdha detare të dekadave të fundit.
