Presidenti i Türkiyes, Recep Tayyip Erdoğan, ka publikuar të dielën një mesazh me rastin e 104-vjetorit të Ditës së Fitores, duke përkujtuar fitoren vendimtare në Luftën për Pavarësi të vendit.
“Sot, me krenari shënojmë 104-vjetorin e Fitores së Madhe, e cila ka hyrë në histori si ‘Beteja e Kryekomandantit’ dhe përbënte fazën më të rëndësishme të Luftës sonë Kombëtare”, ka thënë Erdogan në një deklaratë të shpërndarë nga Drejtoria e Komunikimeve në platformën turke NSosyal.
“I uroj kombin tonë të dashur, popullin turk qipriot dhe qytetarët tanë që jetojnë në vende të ndryshme të botës me rastin e 30 Gushtit, Ditës së Fitores. Shpreh mirënjohjen time më të sinqertë për mysafirët tanë të nderuar që ndajnë gëzimin dhe emocionin tonë në këtë festë në përfaqësitë tona jashtë vendit”, ka thënë presidenti turk.
Erdoğan ka thënë se fitorja e 30 Gushtit ka konfirmuar edhe një herë se tokat ku kombi turk ka jetuar i lirë për një mijë vjet janë “atdheu i tij i përjetshëm”.
“Fitorja e Madhe, e cila gjithashtu hapi rrugën për themelimin e Republikës sonë, i shpalli gjithë botës se kombi ynë kurrë nuk do ta pranonte robërinë, ndërsa njëkohësisht ndihmoi në thyerjen e rrethimit imperialist të gjeografisë sonë’, ka thënë ai.
“Vendosmëria, guximi dhe qëndrueshmëria që treguam si komb 104 vjet më parë, pavarësisht çdo lloj vështirësie, mbeten sot burimi ynë më i fortë i motivimit”, ka shtuar ai.
Erdoğan ka thënë se Türkiye, e frymëzuar dhe duke marrë besim nga “historia e saj e lavdishme”, po përparon vazhdimisht drejt objektivave të saj përmes historive të suksesit në çdo fushë, nga energjia dhe industria e mbrojtjes deri te shkenca, teknologjia dhe politika e jashtme.
“Në një kohë kur luftërat, konfliktet, krizat dhe pasiguritë politike po shtohen në mbarë botën, veçanërisht në rajonin tonë, Türkiye dallohet me politikat e saj proaktive, të bazuara në parime, të vendosura dhe të përqendruara në vlerat humanitare”, ka thënë ai.
“Dua të deklaroj me kënaqësi se sot ekziston një Türkiye që përpiqet të parandalojë shtypjen, pavarësisht se kush e kryen atë, që qëndron pranë të shtypurve, pavarësisht se kush janë ata, dhe që nuk heziton të paguajë çmim kur është e nevojshme për këtë kauzë”, ka deklaruar Erdogan.
Duke cituar një shprehje të lashtë turke, Erdoğan ka thënë: “Përderisa qielli blu sipër nesh të mos shembet dhe toka e errët poshtë nesh të mos shpohet, askush nuk do të mund ta bëjë Türkiyen dhe kombin turk të heqin dorë nga lufta e tyre e bekuar”.
