Një tjetër sulm në depot e shitësit me pakicë më të madh online në Rusi, Wildberries, ka plagosur disa persona, tha të mërkurën CEO dhe bashkëthemeluesja e kompanisë, Tatyana Kim.
Sulmet ndaj një kompanie kaq të rëndësishme për ekonominë duket se janë një zgjatim i strategjisë së Kievit për përdorimin e dronëve me rreze të gjatë veprimi për të prishur përpjekjet luftarake të Rusisë dhe për të ushtruar presion mbi Kremlinin për të bërë paqe.
Kim tha se u sulmuan depot në Krasnodar dhe Nevinnomysk. Pamjet e mediave sociale, të konfirmuara nga Reuters, treguan një re të madhe tymi në Krasnodar.
Autoritetet lokale thanë gjithashtu se një punëtor u vra në një qytet tjetër jugor, Armavir, kur mbeturinat e një droni ranë mbi një biznes.
Guvernatori i rajonit Krasnodar, Veniamin Kondratiev , tha gjithashtu se dhjetë persona u plagosën në sulmin ndaj kompleksit të depove, ndërsa mbetjet e dronit dëmtuan dy rrokaqiej në Krasnodar, ku askush nuk u lëndua.
Autoritetet thanë se do të dërgonin një helikopter për të shuar zjarrin në një depo në Krasnodar. Gjithsej 105 persona morën pjesë në shuarjen e zjarrit.
Një sulm i mëparshëm me dron ukrainas të shtunën vrau tetë punëtorë, shkaktoi zjarre dhe ndërpreu operacionet në Wildberries.
“Nuk ka fjalë për të përshkruar të gjitha ndjenjat dhe emocionet e shkaktuara nga sulmet ndaj njerëzve të zakonshëm, ndaj punonjësve tanë, ndaj të gjithë neve që thjesht po bëjmë punën tonë”, tha Kim në një postim në Telegram. Ukraina nuk ka komentuar mbi sulmet e fundit.
Wildberries filloi si një dyqan online që rishiste rroba nga katalogët evropianë. Që atëherë, ajo ka zgjeruar gamën e produkteve të saj dhe është zhvilluar në një treg që përfshin furnizues të palëve të treta. Wildberries nuk komentoi mbi shkallën e dëmit.
Shitjet online në të gjithë Rusinë u rritën me 28 përqind në vitin 2025 në 11.5 trilionë rubla (rreth 128 miliardë euro), sipas Shoqatës së Kompanive të Tregtisë në Internet. Zëvendëskryeministri Alexander Novak tha se shitjet e mallrave dhe shërbimeve në platformat dixhitale përbëjnë rreth 8.5 përqind të PBB-së.
