Lëvizja Vetëvendosje ka konfirmuar zyrtarisht nominimin e kryetarit aktual të komunës së Dardanës, Kadri Rahimaj, për një mandat të dytë në zgjedhjet lokale të ardhshme, transmeton KosovaPost.
Vendimi u mor gjatë një takimi të mbajtur nga kryesia e qendrës së LVV-së në këtë komunë, në prani të liderit të kësaj partie, njëherësh kryeministrit në detyrë Albin Kurti si dhe strukturave tjera organizative të kësaj force politike.
“Qeverisjes së mirë ia zgjatim dorën e ia japim mbështetjen e parezervë!”, thuhet në njoftimin e LVV-së nga ky takim.
Vetëvendosje e vlerëson mandatin e parë të Rahimajt si një periudhë të qeverisjes së mirë dhe investimeve konkrete në të gjitha drejtimet, duke përfshirë arsimin, infrastrukturën, shëndetësinë dhe sportin.
Në mesin e projekteve të përmendura janë ndërtimi i dy çerdheve të reja, kujdesi për ushqimin dhe shëndetin e nxënësve, ndërtimi i stadiumit të parë të atletikës në vend dhe i stadiumit të Kikës, asfaltimi i rrugëve fshatrave dhe në lagje, si dhe projekti madhor për asfaltimin e brezit kufitar 50.4 km. Një theks i veçantë iu kushtua edhe investimeve në ujësjellës, me gjashtë fshatra të kyçura tashmë në rrjetin e ujit të pijshëm dhe ndërtimin në vazhdim të ujësjellësit në Karaqevë.
“Këto e shumë punë të tjera, nën qeverisjen e shkëlqyeshme të kryetarit Rahimaj dhe ekipit të tij dhe mbështetja e nivelit qendror janë tregues të qartë që Dardanës i duhet Lëvizja sepse i duhet vizioni i saj që për bazë ka qytetarin dhe taksat e tyre i kthen në investime për mirëqenie e për zhvillim. Lëvizja VETËVENDOSJE! në Dardanë e kudo në Kosovë me strukturat e saj organizative ka filluar punën pandalshëm për fitoret tona në komuna, që i duhen Republikës e u duhen qytetarëve, i duhen fshatrave e lagjeve të qyteteve, gjithandej vendit. Është dëshmuar që modeli qeverisës lokal i udhëhequr nga LVV, sikurse në rastin e komunës së Dardanës, është më i duhuri. Prandaj, vazhdojmë fuqishëm përpara”, thuhet në njoftim.
