Lëvizja VLEN ka kërkuar sqarime zyrtare nga autoritetet shqiptare pas ndalimit të tre përfaqësuesve të saj në pikën kufitare të Qafë Thanës, transmeton KosovaPost.
Sipas njw deklarate zyrtare të VLEN-it, koordinatori i Grupit Parlamentar, Bekim Qoku, deputeti Adnan Azizi dhe zëvendëssekretari i përgjithshëm i Qeverisë së Maqedonisë së Veriut, Hasim Murtezani, janë ndaluar për rreth një orë në pikën kufitare Qafë Thanë, pa iu komunikuar një arsye zyrtare.
VLEN deklaron se tre zyrtarët ishin të pajisur me pasaporta diplomatike dhe se, sipas informacioneve jozyrtare të dhëna nga policia kufitare, ndaj tyre ekzistonte një ndalesë hyrjeje në territorin e Shqipërisë.
Megjithatë, sipas këtij subjekti politik, atyre nuk u është paraqitur asnjë dokument, vendim apo arsyetim ligjor për masën e marrë.
Deklarata e VLEN:
Ndalimi pa shpjegim i tre zyrtarëve tanë kërkon përgjigje zyrtare!
Sot, në pikën kufitare Qafë Thanë, koordinatori i Grupit Parlamentar të VLEN-it, Bekim Qoku, deputeti Adnan Azizi dhe zëvendëssekretari i përgjithshëm i Qeverisë, Hasim Murtezani, janë ndaluar për rreth një orë pa asnjë shpjegim zyrtar, ndonëse të tre ishin të pajisur me pasaporta diplomatike.
Sipas informacioneve të komunikuara jozyrtarisht nga policia kufitare, ndaj tyre paska një ndalesë hyrjeje. Megjithatë, asnjë vendim, dokument apo arsyetim nuk u është bërë i ditur.
VLEN kërkon nga autoritetet e Republikës së Shqipërisë të informojnë opinionin publik nëse ekziston vërtet një masë e tillë. Nëse po, kush e ka marrë këtë vendim, mbi çfarë baze ligjore është mbështetur dhe cilat janë arsyet konkrete për një veprim të tillë ndaj zyrtarëve të zgjedhur dhe përfaqësuesve institucionalë.
Marrëdhëniet ndërshqiptare duhet të ndërtohen mbi transparencë, respekt institucional dhe komunikim të qartë, jo mbi ndalesa të pashpjeguara dhe procedura që lënë vend për dyshime
