Presidenti i Serbisë, Aleksandar Vuçiq, më në fund ka reaguar ndaj deklaratave të ministres serbe të Administratës Shtetërore dhe Vetëqeverisjes Lokale, Snezhana Paunoviq, e cila më 11 korrik tha se, po të ishte ajo në vendin e ish-presidentit serb Slobodan Millosheviq, do ta “spastronte etnikisht Kosovën në vitin 1998”.
Vuçiq foli pasi deklarata e saj nxiti një bujë reagimesh lokale dhe ndërkombëtare, duke thënë se deklarata e ministres Paunoviq nuk pasqyron politikën apo vullnetin e presidentit apo të Qeverisë së Serbisë.
Ai shtoi se Serbia duhet të jetë e përgjegjshme dhe se politika serbe duhet të jetë politikë e dialogut, kompromisit dhe bisedimeve – jo e spastrimeve etnike. Vuçiq theksoi gjithashtu se deklaratat e tilla janë të papërgjegjshme dhe se askush nuk duhet të japë deklarata të tilla në publik.
Deklarata e Paunoviq, e bërë në një televizion me frekuencë kombëtare, nxiti bujë reagimesh – nga diplomatët dhe zyrtarët perëndimorë deri te kritikat e kundërshtarëve të Vuçiqit dhe politikave të tij brenda Serbisë. Pas publikimit të kësaj deklarate, autoritetet në Kosovë e shpallën Paunoviqin person non grata. Disa opozitarë serbë, si dhe përfaqësuesi i shqiptarëve në Parlamentin e Serbisë, Shaip Kamberi, kërkuan dorëheqjen e Paunoviq, por deri tani nuk ka shenja se kjo do të ndodhë.
