Deklaratat e presidentit serb, Aleksandar Vuçiq në seancën e Kuvendit të Serbisë lidhur me lirimin e kryeministrit të Kosovës, Albin Kurtit dhe dhjetëra shqiptarëve nga burgu i Serbisë pas luftës në Kosovë, ka ngjallur reagime në vend.
Reagimi i fundit lidhur me këtë deklaratë vjen nga Donjeta Miftari, këshilltare e presidentes Vjosa Osmani.
Ajo ka publikuar një video ku Vuçiq tregon letrën e lirimit nga burgu të Kurtit, të nënshkruar në atë kohë nga presidenti i ish Jugosllavisë, Vojislav Koshtunica.
‘Pavarësisht përpjekjeve për të ‘pastruar’ të kaluarën e Aleksandar Vuçiqit dhe për ta paraqitur atë si konstruktiv ai (Vuçiqi) gjithmonë e zbulon veten e tij të vërtetë”, ka shkruar Miftari në Twitter.
“Këtu ai po ankohet për lirimin e të burgosurve të luftës, të torturuar, duke përfshirë edhe kryeministrin e Kosovës”, ka shtuar ajo.
Lidhur me deklaratën e presidentit serb ka reaguar edhe shefja e Grupit Parlamentar të Lëvizjes Vetëvendosje, Mimoza Kusari Lila.
Ajo ka thënë se Putini në Rusi, dhe ngjashëm Vuçiqi në Serbi i duan kundërshtarët e tyre në burg.
E, për rastin ka reaguar edhe deputeti shqiptar në parlamentin e Serbisë, Shaip Kamberi.
Kamberi në Kuvendin serb ka thënë se e gjithë fajësia për tensionet e ngritura kohëve të fundit, po bartet mbi Kosovën. Sipas tij, e gjithë kriza po personifikohet me figurën e kryeministrit Kurti.
“Albin Kurti nuk është as monstrum e as terrorist. Ai është Kryeministër i zgjedhur në mënyrë legjitime i Qeverisë së Kosovës. Si të tillë do duhej ta pranonit dhe me të të arrinit marrëveshje”, ka thënë Kamberi teksa i është drejtuar Vuçiqit.
Tutje, ai ka deklaruar se i vjen keq që Vuçiq dje disa herë ka shprehur keqardhjen që Kurti nuk është ende nëpër burgjet serbe.