Lamine Yamal ka bërë të qartë ambicien e tij për të fituar “Topin e Artë”, duke deklaruar se e meriton këtë çmim këtë vit dhe duke e renditur Kylian Mbappen përkrah vetes si një nga dy lojtarët më të mirë në botë.
Sulmuesi i Barcelonës u pyet se kujt do t’ia dhuronte “Topin e Artë”, ndërsa fillimisht tha se çmimi duhet t’i takojë lojtarit më të mirë në botë. Më pas, ai e ktheu pyetjen për veten.
“Me sinqeritet mendoj se, sa i përket lojtarit më të mirë në botë, ndoshta jemi dy dhe mendoj se këtë vit do ta meritoja unë, për shkak të asaj që kam fituar”, deklaroi Yamal.
19-vjeçari u pyet nëse me këtë deklaratë kishte parasysh veten dhe Kylian Mbappen, ndërsa përgjigjja e tij ishte e qartë.
“Sepse për mua, Mbappe dhe unë jemi dy lojtarët më të mirë në botë”, tha ylli i Barcelonës.
I pyetur nëse ishte vërtet kaq i bindur për këtë mendim, Yamal nuk ndryshoi qëndrim dhe u shpreh se kushdo që i ndjek rregullisht ndeshjet e tyre mund ta kuptojë arsyetimin e tij.
“Po, për mua është shumë e qartë dhe të gjithë ata që i shikojnë ndeshjet e dinë këtë”, shtoi Yamal.
Deklaratat e spanjollit vijnë në një moment kur gara për “Topin e Artë” është në qendër të vëmendjes, ndërsa Yamal e ka bërë të qartë se e sheh veten si një prej favoritëve kryesorë për ta fituar këtë çmim.
