Presidenti i Ukrainës, Volodymyr Zelensky, ka kërkuar sërish që Ukraina të pranohet në NATO, duke argumentuar se lufta me Rusinë ka dëshmuar kapacitetet ushtarake të vendit dhe rolin e tij kyç në sigurinë e Evropës.
Sipas tij, anëtarësimi i Ukrainës nuk do të ishte vetëm një garanci për Kievin, por edhe një përforcim i vetë aleancës.
Duke folur në Forumin e Industrisë së Mbrojtjes, në kuadër të samitit të NATO-s në Ankara, Zelensky tha se Ukraina nuk është më vetëm përfituese e sigurisë, por edhe një shtet që kontribuon drejtpërdrejt në mbrojtjen e kontinentit.
“A mendoni vërtet se është e drejtë të lihet jashtë NATO-s një vend me këtë nivel të aftësive mbrojtëse? Anëtarësimi i Ukrainës do ta bënte aleancën më të fortë”, deklaroi ai, raporton Euronews, Klankosova.tv.
Ai theksoi se përvoja e fituar nga forcat ukrainase në fushëbetejë, si dhe zhvillimi i teknologjive ushtarake, veçanërisht në fushën e dronëve, e kanë shndërruar Ukrainën në një faktor të rëndësishëm për sigurinë evropiane.
Kreu i shtetit të Ukrainës shtoi se ushtria ukrainase ka arritur të godasë objektiva strategjikë thellë brenda territorit rus, përfshirë rafineri të naftës që ndodhen mijëra kilometra larg kufirit me Ukrainën.
Zelensky nënvizoi se një nga sfidat kryesore mbetet mbrojtja ajrore ndaj raketave balistike. Për këtë arsye, ai kërkoi shtimin e sistemeve amerikane Patriot, ndërsa u bëri thirrje vendeve evropiane të përshpejtojnë zhvillimin e sistemeve të tyre të mbrojtjes ajrore.
