Ndihmës Sekretari i Përgjithshëm i NATO-s për Operacione, Thomas Goffus, ka dalë me një deklaratë pas vizitës që ka zhvilluar në Prishtinë e Sarajevë. Në Kosovë ai u takua me Presidenten Vjosa Osmani, Kryeministrin Albin Kurti, si dhe Komandantin e KFOR’it, Ozkan Ulutas.
Goffus ka thënë se në takimet e djeshme në Kosovë ka theksuar se është jetike që të ketë koordinim në kohë dhe efektiv me NATO-n dhe komunitetin ndërkombëtar edhe për çështjen e Urës së Ibrit, ku ushtarët e KFOR kanë një prani fikse.
Ai ka thënë se ushtarët e KFOR-it mbeten të zellshëm dhe në detyrë, duke përfshirë edhe veriun e Kosovës, duke kryer patrullime të rregullta dhe duke monitoruar nga afër situatën në terren.
“Prania e tyre krijon hapësirë për zgjidhje të koordinuara, diplomatike dhe afatgjatë të çështjeve të mbetura. Është jetike që të kemi një koordinim në kohë dhe efektiv me NATO-n dhe komunitetin ndërkombëtar. Këtë ua theksova të gjithë bashkëbiseduesve të mi sot. Kjo vlen për një mori çështjesh, duke përfshirë urën e Ibrit, ku ushtarët e KFOR-it kanë një prani fikse”, ka deklaruar Goffus.
Goffus ka përmendur rritjen e numrit të trupave të NATO-s gjatë vitit të kaluar në Kosovë, por ka shtuar se kjo nuk është zgjidhja për paqen dhe stabilitetin afatgjatë.
Ai ka thënë se Kosova dhe Serbia duhet të angazhohen në dialogun e ndërmjetësuar nga Bashkimi Evropian, derisa ka bërë thirrje për zbatimin e marrëveshjeve pa vonesa.
“Edhe pse fatkeqësisht është e nevojshme për momentin, më shumë trupa nuk janë zgjidhja për paqen dhe stabilitetin afatgjatë në Kosovë. Zgjidhja është politike. Është thelbësore që si Prishtina ashtu edhe Beogradi të angazhohen në mënyrë konstruktive në dialogun e lehtësuar nga BE-ja për të zgjidhur çështjet në pritje. Ne vazhdojmë t’u bëjmë thirrje të gjitha palëve që të zbatojnë marrëveshjet ekzistuese pa vonesë”, ka deklaruar ai.
Ai ka bërë thirrje që të përgjegjësit për dhunën ndaj ushtarëve të KFOR-it në Zveçan dhe sulmin terrorist në Banjskë të mbahen përgjegjës.
“Presim që përgjegjësit për ngjarjet e vitit të kaluar në Zveçan, si dhe në Banjskë, të mbajnë përgjegjësi. NATO-ja e ka bërë shumë të qartë këtë si në Beograd ashtu edhe në Prishtinë. Përsëri, veprimet e pakoordinuara dhe afatet kohore joreale, së bashku me retorikën përçarëse, nxisin tensione që rrezikojnë paqen dhe stabilitetin në Kosovë. Në këtë kohë kritike për sigurinë evropiane, ne duhet të sigurojmë që të punojmë së bashku, në mënyrë të besueshme”, ka deklaruar ai.
Ai tha se NATO do të vazhdojë të luajë rolin e saj, ndërsa paralajmëroi se paqja mund të mos jetë e garantuar. “Një e ardhme paqësore dhe e begatë për rajonin është e mundur, por jo e garantuar”.
Pas takimit, Kryeministri Albin Kurti ka thënë se së bashku edhe me NATO-n e miqtë e aleatët, mbeten të përkushtuar në ruajtjen e paqes dhe sigurisë në rajon, teksa e rrisim bashkëpunimin e ngushtë e të rregullt me njëri-tjetrin.
“Sundimi i rendit e ligjit mbeten parësore. Do të vijojmë pareshtur të mbrojmë qytetarët e territorin, sovranitetin dhe demokracinë, pavarësinë dhe lirinë, si dhe progresin e prosperitetin tonë”, shkroi Kurti.
Për takimin njoftoi edhe Presidentja Vjosa Osmani.
“Në takim me Ndihmës Sekretarin e Përgjithshëm të NATO-s, Thomas Goffus, ritheksova se Kosova mbetet e përkushtuar për anëtarësim në NATO, si dhe për të kontribuuar bashkërisht në sigurinë rajonale dhe globale , raporton Express.
Bashkë diskutuam edhe për rëndësinë e mirëmbajtjes së komunikimit, koordinimit dhe thellimit të bashkëpunimit në mes të institucioneve tona dhe partnerëve tanë të sigurisë, veçanërisht me NATO-n”, tha Osmani pas takimit.
