Pas sulmit të së hënës në Southport dhe pas homazheve për viktimat, kanë shpërthyer trazirat në këtë qytet. 39 policë janë lënduar ndërsa policia beson se në protesta e trazira janë përfshirë përkrahësit e një grupi të ekstremit të djathtë.
39 oficer policie janë lënduar si pasojë e trazirave që shpërthyen në Southport të Mbretërisë së Bashkuar disa orë pas homazheve që u bënë për viktimat e sulmit me thikë në këtë qytet ku u vranë tre fëmijë ndërsa u lënduan 8 të tjerë ndërsa janë lënduar edhe 2 të rritur. Kështu kanë bërë të ditur ekipet emergjente. 27 nga policët e lënduar janë dërguar në spital ndërsa 12 pas trajtimeve në vendin e ngjarjes nga ekipet mjekësore janë liruar.
Policia në Merseyside ka thënë se tetë nga policët kanë pësuar lëndime më të rënda duke përfshirë fraktura, çarje, një hundë të thyer dhe trauma tjera.
Trazirat, për të cilat policia beson se janë përfshirë përkrahësit e Lëvizjes apo Lidhjes së Mbrojtjes Angleze, organizatë kjo islamofobike e ekstremit të djathtë, kanë nisur vetëm disa rrugë larg lokacionit ku ka ndodhur sulmi, afër një xhamie. Protestuesit kanë hedhur tulla drejt xhamisë, u kanë vënë automjeteve dhe shportave të mbeturinave flakën dhe kanë dëmtuar një dyqan, ka thënë policia.
Një djalosh 17 vjeçar është arrestuar si i dyshuar për vrasje dhe vrasje në tentative pas sulmit të së hënës. Alex Goss, ndihmës-shefi i policisë në Southport ka thënë se ka pasur shumë spekulime dhe hipoteza rreth statusit të 17 vjeçarit të arrestuar. Kemi thënë se personi i arrestuar është i lindur në Britani të Madhe dhe për momentin spekulimet nuk i ndihmojnë askujt, ka thënë Goss./rtk
