28 burra shqiptarë të dënuar për terrorizëm në Maqedoni të Veriut, vazhdojnë ta vuajnë dënimin në atje.
Transferimi i tyre në Kosovë për vuajtje të dënimit, ende është në pikëpyetje.
Nga Ministria e Drejtësisë e Maqedonisë së Veriut, thonë se kjo mund të shqyrtohet pasi institucionet e Kosovës të njohin vendimet e gjykatave maqedone.
“Autoritetet e Kosovës duhet së pari t’i njohin aktgjykimet e gjykatave tona. Dokumentacioni ende nuk është kompletuar, pas përfundimit, do të shqyrtohen variantet e mundshme dhe në koordinim me MPB-në dhe autoritetet e Kosovës do të përcaktohet nëse ka mundësi për një gjë të tillë”, thuhet në përgjigjen e Ministrisë maqedone.
Ndërkohë, Ministria e Drejtësisë në Kosova ka theksuar se aktualisht nuk ka asnjë kërkesë aktive për transferimin e të dënuarve, por duke lënë të hapur mundësinë e angazhimit në rast se në të ardhmen vjen një kërkesë e tillë.
“Në momentin që do të pranoj ndonjë kërkesë, Ministria e Drejtësisë do t’i ndërmarr të gjitha veprimet e përcaktuara në ligj sipas mandatit ligjor dhe menjëherë do ta përcjell kërkesën ose kërkesat për tek Gjykata Themelore në Prishtinë për procedura të mëtutjeshme”, thuhet në përgjigjen e Ministria e Drejtësisë.
Bazuar në legjislacionin në fuqi dhe marrëveshjet mes Kosovës dhe Maqedonisë së Veriut, sipas Anton Nrecaj nga Instituti CLARD, transferimi i të burgosurve është i pamundur.
7 prej të akuzuarve në rastin Kumanova janë të dënuar me burg të përjetshëm, ndërsa të tjerët me gjithsej 746 vjet burg.
Ata u gjykuan si organizatorë të ngjarjeve në “Lagjen e Trimave” në Kumanovë, në maj të vitit 2015, ku u vranë 8 policë maqedonas, 10 protestues, dhe 37 oficerë u plagosën.
