Presidenti amerikan Joe Biden falënderoi aleatët, përfshirë Türkiyen, për një shkëmbim të madh të të burgosurve midis SHBA-së dhe Rusisë, transmeton Anadolu.
“Unë u jam mirënjohës aleatëve tanë që qëndruan me ne gjatë negociatave të vështira dhe komplekse për të arritur këtë rezultat, duke përfshirë Gjermaninë, Poloninë, Slloveninë, Norvegjinë dhe Türkiyen”, shkroi Biden në X.
Komentet e tij u bënë menjëherë pasi Türkiye njoftoi se Organizata Kombëtare e Inteligjencës (MIT) udhëhoqi një shkëmbim të suksesshëm të të burgosurve që përfshin shtatë vende në “një nga operacionet më të gjera” të shkëmbimit në vitet e fundit.
Sipas burimeve të sigurisë, gjithsej 26 individë u përfshinë në shkëmbimin e së premtes, të transportuar në kryeqytetin turk Ankara me shtatë avionë, një nga Gjermania, Polonia, Sllovenia, Norvegjia, Rusia dhe dy nga SHBA.
Bjellorusia ishte gjithashtu e përfshirë në shkëmbim.
“Sot, tre shtetas amerikanë dhe një mbajtës i kartonit jeshil amerikan që u burgosën padrejtësisht në Rusi po kthehen më në fund në shtëpi: Paul Whelan, Evan Gershkovich, Alsu Kurmasheva dhe Vladimir Kara-Murza. Marrëveshja që siguroi lirinë e tyre ishte një vepër e diplomacisë”, tha Biden.
Sekretari amerikan i shtetit Antony Blinken gjithashtu vlerësoi mbështetjen nga aleatët e SHBA-së dhe tha se Washingtoni vlerëson që qeveria turke ofron një vend për kthimin e sigurt të të burgosurve në SHBA dhe Gjermani.
“Ne jemi mirënjohës për mbështetjen që patëm nga disa aleatë tanë që e bënë të mundur këtë marrëveshje, në veçanti Gjermania, Polonia, Norvegjia dhe Sllovenia”, tha Blinken në një deklaratë, duke shtuar: “Ne vlerësojmë më tej se qeveria turke ka siguruar një vend për kthimin e sigurt të këtyre individëve në Shtetet e Bashkuara dhe Gjermani”.
Blinken përshëndeti “përpjekjet e jashtëzakonshme” të njerëzve të panumërt në Departamentin e Shtetit dhe në qeveri për të siguruar një marrëveshje për të liruar reporterin e Wall Street Journal, Evan Gershkovich, ish-marinsin Paul Whelan dhe gazetaren Alsu Kurmasheva, të cilët mbaheshin në burgjet ruse.
“Nën udhëheqjen e Presidentit Biden, ne kemi siguruar lirimin e dhjetëra amerikanëve që u mbajtën peng ose u ndaluan gabimisht. Betimi im për familjet e atyre që janë ende të ndarë nga familjet e tyre është i njëjti që u bëra atyre që kthehen sot në shtëpi”, shtoi ai.
