Në fjalimin e tij të lamtumirës drejtuar kombit, presidenti amerikan Joe Biden theksoi dje në mbrëmje dominimin në rritje të një “oligarkie” të udhëhequr nga super të pasurit.
Duke folur nga Zyra Ovale, Biden përshkroi rritjen e pasurisë, fuqisë dhe ndikimit ekstrem në Shtetet e Bashkuara të Amerikës.
“Kjo kërcënon të gjithë demokracinë tonë, të drejtat dhe liritë tona themelore dhe një mundësi të drejtë për të gjithë për të ecur përpara”, tha Biden.
Biden vuri në dukje një përqendrim të rrezikshëm të pushtetit në duart e disa njerëzve super të pasur – duke paralajmëruar për pasoja të rrezikshme në rast se shpërdorimi i tyre i pushtetit lihej i pakontrolluar.
Ai paralajmëroi gjithashtu për rreziqet e një kompleksi teknologjio-industrial që mund të përbënte rreziqe reale edhe për SHBA-në.
“Amerikanët po varrosen nën një ortek keqinformimi dhe dezinformimi, duke mundësuar abuzimin e pushtetit”, tha Biden.
“Shtypi i lirë po shkatërrohet. Redaktorët po zhduken. Mediet sociale po heqin dorë nga kontrolli i fakteve. E vërteta mbytet nga gënjeshtra, për pushtet dhe për përfitim”, tha ai.
“Ne duhet të bëjmë përgjegjëse platformat sociale, për të mbrojtur fëmijët tanë, familjet tona dhe vetë demokracinë tonë nga abuzimi me pushtetin”, theksoi Biden.
Biden dukej se iu referua miliarderëve amerikanë, Elon Musk dhe Mark Zuckerberg, pa i përmendur ata drejtpërdrejt.
Musk mban një marrëdhënie veçanërisht të ngushtë me pasardhësin e Biden, Donald Trump, i cili do të betohet si presidenti i ri i SHBA-së, të hënën më 20 janar.
Biden, një demokrat veteran, jo vetëm që do të largohet nga Shtëpia e Bardhë pas katër vitesh në krye të demokracisë më të fuqishme në botë, por gjithashtu do të mbyllë perden e një karriere të gjatë në politikë, shkruan atsh.“Ka qenë privilegji i jetës sime t’i shërbej këtij kombi për më shumë se 50 vjet”, shkroi Biden në një mesazh të përzemërt të publikuar përpara fjalimit të tij zyrtar të lamtumirës.
