Kryeministri i Kosovës, Albin Kurti, në mbledhjen e Qeverisë ka thënë se ky buxhet vjen pas vitit më të suksesshëm në histori sa i përket të hyrave, përcjell Kosova Post.
Nga ky buxhet, kryeministri Kurti ka njoftuar se kanë ndarë 860 milionë euro për investime kapitale, ndërsa 742 milionë buxhet do të ndahen për komunat në buxhetin e vitit 2024.
“Për sektorin publik, kemi thënë qysh në fillim të këtij vitit se koeficienti i pagave për vitin 2024 do të jetë 110 euro dhe këtë po e realizojmë, pra po i rrisim pagat në sektorin publik, ashtu siç kemi thënë”, tha kryeministri Kurti.
Ndërsa ministri i Financave, Hekuran Murati, tha se rritja ekonomike në 2023-n pritet të përmbyllet me 4 për qind në terma real dhe 9 për qind në terma nominal. Rritjes ekonomike do t’i paraprijë edhe një dinamikë e përshpejtuar e ekzekutimit të investimeve kapitale publike dhe orientimit në sektorë prioritarë. Presim që në 2024-n të hyrat e buxhetit të arrijnë në 3 miliardë e 28 milionë euro, që paraqet një rritje prej 5 për qind në raport me vitin paraprak.
