Rrustem Mustafa – Remi ka propozuar krijimin e një koalicioni të gjerë politik, me Lëvizjen Vetëvendosje dhe Partinë Demokratike të Kosovës në qendër të tij, duke vlerësuar se situata aktuale kërkon një marrëveshje që do të sillte më shumë unitet dhe një drejtim të përbashkët shtetëror, përcjell KosovaPost.
Në qëndrimin e tij, Mustafa thotë se VV-ja, PDK-ja dhe partitë e tjera duhet të hapin dialogun për një marrëveshje të ndërtuar mbi, siç shprehet ai, “interesat themelore të Republikës”.
Sipas Mustafës, një marrëveshje e tillë duhet të mbështetet në tri shtylla kryesore: unitetin politik dhe qetësimin e brendshëm, mbështetjen juridike dhe angazhimin diplomatik.
Ai kërkon bashkërendim më të madh ndërmjet forcave politike dhe shoqërisë civile, me synimin që çështjet që konsiderohen interes shtetëror të trajtohen përmes bashkëpunimit dhe përgjegjësisë së përbashkët.
Një pjesë të rëndësishme të propozimit të tij Mustafa ia kushton edhe proceseve juridike. Ai kërkon forcimin e ekipeve mbrojtëse dhe sigurimin e mbështetjes së nevojshme juridike për proceset e mëtejshme, duke insistuar në “standarde të barabarta të drejtësisë”.
Shtylla e tretë, sipas tij, duhet të jetë diplomacia. Mustafa propozon një veprim të koordinuar në arenën ndërkombëtare për të paraqitur argumentet lidhur me historinë e Kosovës dhe të UÇK-së, si dhe për avancimin e interesave të Republikës.
“Mbi të gjitha, forcimi i partneritetit strategjik me SHBA-në dhe Perëndimin duhet të jetë orientimi i përbashkët”, shkruan Mustafa.
Ai thekson se ideja nuk duhet parë vetëm si një bashkim politik për një situatë të caktuar, por si mundësi për një marrëveshje më të gjerë me objektiva dhe përgjegjësi të përcaktuara.
“VV, PDK dhe partitë e tjera: një tryezë e përbashkët, një marrëveshje e qartë, një drejtim shtetëror”, është mesazhi i Mustafës, i cili propozimin e tij e përmbledh me thirrjen: “KOALICION I MADH PËR KOSOVËN.”
Postimi i plotë:
KOALICION I MADH PËR KOSOVËN, VV / PDK
Në këtë moment të rëndësishëm, Kosovës i duhet një marrëveshje e madhe politike që sjell unitet, qartësi dhe drejtim shtetëror.
Prandaj, VV, PDK dhe partitë e tjera mund të hapin dialogun për një marrëveshje të përbashkët, të ndërtuar mbi interesat themelore të Republikës.
Tri shtylla duhet ta udhëheqin këtë angazhim:
UNITET POLITIK DHE QETËSIM I BRENDSHËM
Bashkërendim i forcave politike dhe shoqërisë civile rreth interesit shtetëror, duke krijuar një klimë bashkëpunimi dhe përgjegjësie.
MBËSHTETJE JURIDIKE
Forcim i ekipeve mbrojtëse dhe sigurim i mbështetjes së nevojshme juridike për proceset e mëtejshme, me standarde të barabarta të drejtësisë.
ANGAZHIM DIPLOMATIK
Një veprim i koordinuar ndërkombëtar për të paraqitur me argumente historinë e Kosovës dhe UÇK-së dhe për të avancuar interesat e Republikës.
Mbi të gjitha, forcimi i partneritetit strategjik me SHBA-në dhe Perëndimin duhet të jetë orientimi i përbashkët.
Ky nuk është vetëm një bashkim rreth një momenti.
Është një mundësi për të ndërtuar një marrëveshje politike me përgjegjësi, objektiva dhe drejtim të qartë për Kosovën.
VV, PDK dhe partitë e tjera: një tryezë e përbashkët, një marrëveshje e qartë, një drejtim shtetëror.
KOALICION I MADH PËR KOSOVËN.
