Deputeti i Lëvizjes Vetëvendosje, Dimal Basha, ka reaguar ashpër ndaj deklarimeve të kryetarit të Drenasit, Ramiz Lladrovci, i cili sipas tij, ka pohuar se Sami Lushtaku ka kërcënuar inspektorët komunalë dhe pjesëtarë të Policisë së Kosovës, përcjell KosovaPost.
Sipas Bashës, veprimet e tilla janë të papranueshme dhe kërkojnë ndërhyrje urgjente të Prokurorisë Speciale. Ai ka ngritur shqetësime edhe për mënyrën se si Lushtaku po pretendon pronësi mbi toka që figurojnë në emër të personave të tjerë.
“Prokuroria Speciale duhet ta thërrasë në pyetje Sami Lushtakun, sepse askush nuk guxon ta kërcënojë Policinë e Kosovës. Policia jonë ka luftuar banditët në veri, dhe jam i bindur se do ta bëjë të njëjtën gjë edhe në jug,” ka deklaruar Basha.
Ai gjithashtu kërkoi që të hetohet procesi i privatizimit të tokave që Lushtaku pretendon si pronë të tij, ndërkohë që ato janë në emër të tjetërkujt.
“A e ka deklaruar këtë tokë në Agjencinë Kundër Korrupsionit? Dhe a po merret kjo agjenci me këtë çështje?”, pyeti ai.
Në fund të reagimit, Basha i ka bërë thirrje gazetarëve që të kërkojnë përgjigje zyrtare nga Komuna e Drenasit, dhe njëkohësisht u ka bërë apel analistëve televizivë që të trajtojnë këtë temë në studio mbrëmjen e sotme.
