Bellingcat, Christo Grozev, i cili prej vitesh shkruan mbi krimet e regjimit të Vlladimir Putinit kundër kritikëve në Rusi dhe jashtë saj, ka njoftuar në profilin e tij në X se disidenti rus Ilija Jashin kërkoi të mos përfshihet në listën për shkëmbim të të burgosurve me arsyetimin se nuk dëshironte ta bënte të lumtur Putinin.
Dy ditë para se të bëhej shkëmbimi, zyrtarët rusë i kërkuan Jashinit t’ia dërgojë Putinit një kërkesë për falje. Jashin refuzoi.
Ai tha se nuk dëshiron ta lusë për falje një kriminel lufte. Ditën tjetër zyrtarët rusë ia përsëritën kërkesën. Jashin refuzoi prapë.
Dhe shkroi një letër ku nënvizoi: “Refuzoj të shkëmbehem kundër vullnetit tim, pasi që kjo është kundërkushtetuese”.
Jashin tha se instinkti i tij i parë ishte të kthehet në atdheun e tij.
Por, sipas tij, ishte e qartë se nuk do të kishte më kurrë rast të shkëmbehet dhe të largohet në Perëndim.
Megjithatë, Jashin insiston se nuk e sheh veten të shkëmbyer, por të dëbuar nga vendi i tij.
Qëllimi i tij është që një ditë të kthehet në Rusinë e lirë, për të cilën dëshiron të luftojë nga ekzili.
Ngjashëm veproi Vlladimir Kara Mursa, edhe ky njëri nga disidentët prominentë rusë që mbaheshin në burg nga regjimi i Putinit.
Oficerët e shërbimit sekret rus FSB i kërkuan atij t’i lutet Putinit që ta falë. Kara Mursa refuzoi.
Ditën tjetër në qelinë e tij erdhën sërish oficerët e FSB-së. Ai kërkoi një letër dhe shkroi në të krejt çfarë mendonte për Putinin.
Në orën 3 të natës e zgjuan nga gjumi dhe e dërguan në aeroport.
PS. Para disa vitesh Vlladimir Kara Mursa qëndroi në Beograd për t’i takuar disa opozitarë rusë.
Ky ishte një gabim i madh i tij, sepse në kryeqytetin serb atë e përgjoi shërbimi sekret serb, i cili drejtohej nga argati besnik i Rusisë, Aleksandar Vullin.
Ky pastaj ia dorëzoi Kremlinit dosjen e përgjimit të opozitarëve rusë.
Pas kthimit në Moskë, Kara Mursa u arrestua. Në prill të vitit 2023 ai u dënua me 25 vjet burg. (Enver Robelli)
