Zgjedhjet e 28 dhjetorit të këtij viti, ende nuk e kanë sjell rezultatin final, e që është formimi i Qeverisë.
Për shkak të dyshimeve për manipulim gjatë numërimit të votave për kandidatët për deputetë, u shtye edhe shpallja e këtyre rezultateve që u bë më 31 janar, por certifikimi i rezultateve nuk është bërë ende.
Pas shpalljes së rezultateve përfundimtare, partitë politike apo kandidatët për deputetë të Kuvendit të Kosovës kishin drejtë të dorëzonin ankesë në Panelin Zgjedhor për Ankesa dhe Parashtresa. Nga gjashtë ankesa që janë dorëzuar aty, PZAP më 3 shkurt i ka publikuar vendimet duke e miratuar vetëm ankesën e Listës Serbe.
Kjo ankesë kishte ardhur pasi KQZ nuk e kishte shpallur rezultatin e Listës Serbe, e për këtë PZAP mori vendim ta aprovonte.
Pasi PZAP i ka refuzuar pesë ankesa, ata që i kanë parashtruar ato, kanë vazhduar rrugën juridike.
Në momentin e hapjes së afatit për t’i dorëzuar ankesat në Gjykatë Supreme, aty janë dorëzuar gjashtë sosh.
Këtë e kanë konfirmuar për lajmi.net nga Gjykata Supreme.
“Janë dorëzuar:
1 ankesë administrative, kundër vendimit të PZAP-së, nga Partia Rome e Bashkuar e Kosovës.
1 ankesë administrative, kundër vendimit të PZAP-së, ngaKoalicioni PAI-PDAK-LPB
1 ankesë administrative, kundër vendimit të PZAP-së, nga Emilia Rexhepi (NDS)
1 ankesë administrative, kundër vendimit të PZAP-së, nga Partia e Re Demokratike (Nova Demokratski Stranka-NDS), Prizren
2 ankesa administrative, kundër vendimve të PZAP-së, nga Bekim Haxhiu”, kanë thënë nga Gjykata Supreme për lajmi.net.
Ata gjithashtu kanë thënë se afati për t’i vendosur këto ankesa nga Gjykata Supreme është pesë ditë.
Pasi Gjykata Supreme do të marr vendime për to, rruga i hapet certifikimit të rezultateve e më pas seancës konstituive të Kuvendit të Kosovës.
Në atë seancë pritet të betohen deputetët e rinj, të zgjidhet kryetari dhe pesë nënkryetarët e Kuvendit të Kosovës.
Në bazë të rezultatit të zgjedhjeve të 28 dhjetorit, ku VV ka siguruar 57 deputetë i duhen vetëm edhe katër vota të minoriteteve për të votuar për kryetarin e Kuvendit, gjë që nuk po shihet e vështirë për t’u bërë.
Sfiduese po shihet përsëri emërimi i nënkryetarit të Kuvendit nga komuniteti serb, pasi që Gjykata Kushtetuese e ka shpallur si antikushtetues emërimin e Nenad Rashiqit si nënkryetar. Nga kjo Gjykatë kanë thënë se nënkryetari nga komuniteti serb duhet t’i takoj grupit parlamentar me më shumë deputetë.
Më 4 mars është data e fundit kur duhet të jetë i konstituuar Kuvendi, të jetë e formuar Qeveria e Kosovës dhe të jetë i/e zgjedhur Presidenti/ja i/e re e Kosovës. Nëse me 5 mars nuk është zgjedhur Presidenti i Kosovës, vendi shkon në zgjedhje të reja. /Lajmi.net
