Eliminimi nga Kupa e Mbretit përballë një skuadre të kategorisë së dytë spanjolle ka ngjallur kritika ndaj trajnerit të Realit të Madridit, Zinedine Zidane, i cili përshkruhet nga mediat spanjolle në largim në fund të sezonit.
Të mërkurën mbrëma, kampionët e Spanjës u mundën 2-1 me kohë shtesë nga Alcoyano, një skuadër e kategorisë së dytë nga qyteti i Valencias. Zidane, qe i detyruar të bëjë rotacion në skuadër, mirëpo gjatë 120 minutave të ndeshjes angazhoi pothuajse të gjithë skuadrën kryesore – qëndroi i pa-angazhuar vetëm Luka Modric, teksa debutuan portieri Andriy Lunin dhe Victor Chust.
Mirëpo përveç mbrojtësit Eder Militao, askush tjetër nuk mundi të shënojë gol. Sikur të mos mjaftonte kjo, pas barazimit të Solbes për Alcoyanon, në pjesët shtesë këta të fundit shënuan golin e përmbysjes edhe duke luajtur me një lojtar më pak – pas daljes me të kuq të Lopez.
Juanan Casanova ishte autori i fitores. Alcoyano vijon kështu më tej në Kupën e Mbretit, ndërsa Reali pëson turpërimin e radhës pas eliminimit nga Super-Kupa me Atheltic Bilbaon.
Në pesë ndeshjet e fundit Zidane ka mundur të marrë vetëm një fitore ndaj Celta Vigos. Përpara ndeshjes në Kupën e Mbretit, ai nuk pati ndryshuar shumë formacionin dhe, sidomos ndaj Athletic Bilbaos, lojtarët qenë shfaqur të lodhur.
Kritikat për francezin janë shtuar pasi së fundmi Martin Odegaard ka kërkuar të largohet, në pikëpyetje është vënë edhe qëndrimi i kapitenit Sergio Ramos, ndërkohë që prej rikthimit të Zidane në krye të skuadrës, nga ana taktike nuk ka pasur ndonjë ndryshim në lojë.
Sezonin e shkuar Reali i Madridit shpenzoi 350 milionë euro për të afruar lojtarë si Eden Hazard, Luka Jovic, Eder Militao, Ferland Mendy, Rodrygo, apo Reiner. Prej tyre vetëm Militao ka mundur të kthehet në lojtar kryesor.
Zidane u kthye te Reali në mars 2019, pas rreth një viti shkëputje. Në tre vitet e para të drejtimit të tij Los Blancos fituan tre tituj të Champions-League-ës radhazi, një kampionat dhe dy tituj kampionë bote për klube. Në rikthim, ai i ka sjellë Realit vetëm një titull kampion të La Ligas, ndërsa është munduar të reformojë skuadrën me ndryshimin e brezave të lojtarëve.
Në Spanjë gazetarë të ndryshëm, si për shembull Guillem Balague, po shprehen se Zidane është në fund të përvojës së tij te Reali, por që largimi i mundshëm nga drejtimi mund të ndodhë pas fundit të sezonit.euronews,al