Sipas një raporti të ri të publikuar në rrjetin social X, në pronësi të Elon Musk, evropianët po e braktisin masivisht këtë platformë.
Të dhënat më të fundit të publikuara këtë javë nga X – të cilat kompania ishte e detyruar t’i bëjë publike për t’u përputhur me rregulloren kryesore teknologjike të Bashkimit Evropian, Ligjin për Shërbimet Digjitale – tregojnë një rënie të ndjeshme të numrit të përdoruesve në Evropë.
Aktualisht, platforma ka rreth 95 milionë përdorues në Evropë, nga afërsisht 105 milionë një vit më parë – një rënie prej 10,5 për qind brenda gjashtë muajsh. Lituania dhe Luksemburgu kanë humbur një të katërtën e përdoruesve të tyre, shkruan politico.
Musk, i cili ishte një nga këshilltarët më të zëshëm të presidentit amerikan Donald Trump gjatë 100 ditëve të para të mandatit të tij të dytë, bleu X – atëherë i njohur si Twitter – në vitin 2022. Ndryshimet që ai bëri në rregullat e platformës dhe mbështetja e lëvizjeve politike të djathta nga Shtetet e Bashkuara deri në Evropë kanë shkaktuar kritika për përhapjen e dezinformatave dhe gjuhës së urrejtjes në faqen e internetit.
Qyteti i Parisit e braktisi platformën në janar, duke iu bashkuar një sërë llogarish të tjera që janë larguar pas marrjes së kontrollit nga Musk – nga shkrimtari legjendar Stephen King, te Universiteti i Leeds dhe media të ndryshme, përfshirë gazetën britanike The Guardian.
Komisioni Evropian po heton nëse X po i përmbahet kërkesave të BE-së për të vepruar ndaj përmbajtjes ilegale dhe lajmeve të rreme që nga viti 2023, dhe e ka akuzuar platformën për shkelje të ligjit në korrikun e kaluar, ndonëse ende nuk ka vendosur një ndëshkim të shumëpritur.
Kompania e Muskut për automjete elektrike, Tesla, gjithashtu ka pësuar rënie në Evropë muajt e fundit, me shitjet që ranë me mbi 50 për qind gjatë janarit dhe shkurtit të këtij viti.
