Komisioni Rregullativ i Prokurimit Publik (KRPP), në bashkëpunim me SIGMA/OECD, organizoi konferencën ndërinstitucionale me temën “Fuqizimi i Sistemit të Prokurimit Publik në Kosovë”, e cila organizohet në kuadër të bashkëpunimit ndërinstitucional në fushën e prokurimit publik në Republikën e Kosovës.
Konferenca synon të forcojë koordinimin dhe bashkëpunimin ndërmjet institucioneve relevante, si dhe të thellojë përkushtimin e përbashkët për avancimin e mëtejshëm të sistemit të prokurimit publik në vend.
Anëtari i Bordit të KRPP-së, Avni Sahiti theksoi se kjo konferencë përbën një hap të rëndësishëm drejt një sistemi të besueshëm të prokurimit publik duke u fokusuar në forcimin e bashkëpunimit ndërinstitucional. Ai prezantoi edhe gjetjet e raportit të Prokurimit Publik për vitin 2024.
“Kosova nëpërmjet prokurimit publik ka kontraktuar rreth 940 milionë euro apo rreth 9.3% të bruto produktit vendo që është për rreth 5% më e ulët se mesatarja e vendeve të EU-së, por që për vendin tonë është shumë e konsiderueshme marrë parasysh nivelin e zhvillimit të sektorit publik dhe atij privat të një vendi. Duhet theksuar që nga kjo shumë, rreth 53% janë shpenzuar në kategoritë e kontratave për punë, që është një tregues shpresëdhënës në rritje ta investimeve nëpërmjet prokurimit publik”, ka thënë ai.
Edhe të pranishmit e tjerë diskutuan për sfidat, mundësitë dhe praktikat më të mira ndërkombëtare për përmirësimin e sistemit të prokurimit publik
Gjatë periudhës 01 janar – 31 dhjetor 2024, KRPP ka monitoruar gjithsej 4,522 njoftime për kontratë, duke mbuluar të gjitha 175 autoritetet kontraktuese në Kosovë.rtk.
