Një tjetër gazetar palestinez u vra në sulmet e ushtrisë izraelite në Rripin e Gazës, transmeton Anadolu.
Në deklaratën me shkrim të Zyrës për media të qeverisë në Gaza, jepen informacione për gazetarët e vrarë në Rripin e Gazës nga sulmet izraelite.
Thuhet se gazetari Hamza Abdurrahman Murtaji ka humbur jetën në sulmet e ushtrisë izraelite në Gaza. Raportohet se numri i gazetarëve të vrarë në Rripin e Gazës, i cili është sulmuar nga ushtria izraelite që nga 7 tetori 2023, është rritur në 170.
Në deklaratë u dënua sulmi i ushtrisë izraelite ndaj gazetarëve në Rripin e Gazës dhe theksohet se Izraeli ishte përgjegjës për vrasjen e gazetarëve.
Në deklaratën drejtuar komunitetit ndërkombëtar dhe organizatave ndërkombëtare të lidhura me mediat, ata kërkuan vendosjen e sanksioneve parandaluese ndaj Izraelit për të ndaluar vrasjen e gazetarëve palestinezë dhe për të ndërmarrë veprime që ai të gjykohet në gjykatat ndërkombëtare për krimet e kryera.
Sipas lajmit në shtypin palestinez, gazetari palestinez Murtaji humbi jetën në sulmin izraelit që synonte shkollën “Mustafa Hafiz”, ku civilët e zhvendosur u strehuan në lagjen Er-Rimal në perëndim të qytetit të Gazës.
Në një deklaratë të mëparshme nga Zyra për media e qeverisë në Gaza thuhet se “Izraeli vrau me dashje gazetarët në Gaza për të heshtur zërin palestinez, për të fshehur faktet dhe për të parandaluar që lajmet dhe informacionet të arrijnë në publikun rajonal dhe ndërkombëtar”.
