Kancelari gjerman Friedrich Merz i ka kërkuar kryeministrit izraelit Benjamin Netanyahu të lejojë shpërndarjen e ndihmës për palestinezët në një mënyrë “të sigurt” dhe “humane”, transmeton Anadolu.
Merz ka zhvilluar një telefonatë me Netanyahun dhe ka diskutuar zhvillimet e fundit në rajon, duke shprehur shpresën e tij për një armëpushim të menjëhershëm në Gaza, tha zëdhënësi i tij Stefan Kornelius në një deklaratë.
“Kancelari theksoi se ndihma humanitare e nevojshme urgjentisht duhet të arrijë tani tek njerëzit në Rripin e Gazës në një mënyrë të sigurt dhe humane”, tha ai, duke iu referuar mekanizmit kontrovers izraelit të shpërndarjes së ndihmës, i cili është dënuar ndërkombëtarisht.
Merz ka bërë thirrje me vendosmëri për lirimin e menjëhershëm të të gjithë individëve të mbetur të mbajtur robër nga Hamasi, përfshirë qytetarët gjermanë.
“Kancelari Merz u shpreh në favor të gjetjes së një rendi të qëndrueshëm pas luftës për Gazën që merr parasysh nevojat e sigurisë izraelite dhe të drejtën palestineze për vetëvendosje”, shtoi zëdhënësi, duke vënë në dukje se Berlini e konsideron çarmatimin e Hamasit thelbësor.
Ai gjithashtu tha se, gjatë telefonatës, Merz ka theksuar se “nuk duhet të ketë hapa drejt aneksimit të Bregut Perëndimor”, duke përforcuar angazhimin e hershëm të Gjermanisë për një zgjidhje me dy shtete.
Gjermania ka qenë prej kohësh mbështetëse e fortë e Izraelit, me udhëheqës politikë që vazhdimisht përmendin përgjegjësinë historike të vendit ndaj Izraelit të rrënjosur në të kaluarën naziste të Gjermanisë dhe Holokaustin.
Megjithatë, qeveria Merz ka miratuar një qëndrim më kritik në javët e fundit pas ofensivës së rifilluar ushtarake të Izraelit në Gaza, bllokadës së shpërndarjes së ndihmës humanitare dhe propozimeve të ministrave izraelitë për të dëbuar palestinezët dhe për të aneksuar territorin.
Që kur Izraeli nisi fushatën e tij ushtarake në Gaza në vitin 2023, më shumë se 59.000 palestinezë janë vrarë dhe mbi 100.000 të tjerë janë plagosur, shumica prej tyre gra dhe fëmijë.
Izraeli aktualisht përballet me një padi për gjenocid në GJND për veprimet e tij në Gaza, ku të paktën 1,9 milion palestinezë mbeten të zhvendosur dhe vuajnë nga mungesa të mëdha ushqimi, furnizimesh mjekësore dhe artikujsh të tjerë thelbësorë.
