Kosova të shmangë që e ardhmja t’i përcaktohet nga veprimet e të tjerëve, nevojë për diplomaci të shkëlqyer, lidershipi të bashkohet dhe të formojë sa më shpejt kuvendin dhe qeverinë e re janë disa nga adresimet e ambasadorit britanik në Kosovë, Jonathan Hargreaves, në një opinion të tij. Ai ka përmendur edhe aksionet në veri, për çka thotë se “e minojnë pretendimin e Kosovës se të gjithë qytetarët janë të mirëpritur dhe të lirë të përfaqësohen, të mbrohen dhe të fuqizohen në Republikën e Kosovës”.
Një ditë pasi Mbretëria e Bashkuar dhe BE-ja kanë arritur një marrëveshje të re që përcakton marrëdhëniet post Brexit-it në fushat që përfshijnë të drejtat e peshkimit, tregtinë dhe mbrojtjen, Ambasadori i Mbretërisë së Bashkuar në Prishtinë, Jonathan Hargreaves, në një op-ed që ia ka dërguar Gazetës Express për botim ka folur për marrëdhëniet mes Kosovës dhe BE’së e Britanisë.
Duke e përmendur partneritetin e ri mes Mbretërisë së Bashkuar dhe Bashkimit Evropian Hargreaves ka shkruar se se tani duhet një lidership i Kosovës i gatshëm të marrë iniciativën dhe të punojë me ta.
“Sekretari kujtoi vizionin e ish-kryeministrit Tony Blair: që Kosova të jetë në gjendje të përcaktojë vetë të ardhmen e saj, të jetojë në paqe me fqinjët dhe të mbrojë të drejtat e të gjithë qytetarëve që jetojnë këtu.”
Hargreaves ka thënë se Kosova ka nevojë për një urgjencë të re politike për të marrë iniciativën dhe për të shmangur “që e ardhmja t’i përcaktohet nga veprimet e të tjerëve”.
“Ai gjithashtu bëri thirrje për vendosmëri nga liderët politikë të Kosovës, përgjatë gjithë spektrit politik. Kosova ka nevojë për një urgjence të re politike, për të marrë iniciativën dhe për të shmangur që e ardhmja të i përcaktohet nga veprimet e të tjerëve. Ashtu si po ndodh me marrëdhënien e re Mbretëri e Bashkuar – BE, ai inkurajoi Kosovën të ofrojë pragmatizëm, dhe jo pozicione puriste.”
Ambasadori britanik thotë se në këtë “moment vendimtar” Kosova vazhdon të jetë pa kuvend dhe qeveri funksionale. Ai i ka bërë thirrje lidershipit kosovar që të bashkohet dhe të formojë sa më shpejt kuvendin dhe qeverinë e re.
“Në këtë moment vendimtar, Kosova vazhdon të jetë pa parlament dhe pa qeveri funksionale. Ne i bëjmë thirrje lidershipit politik të Kosovës që të bashkohet, të formojë sa më shpejt kuvendin dhe qeverinë e re, dhe të fokusohet në prioritetet që kanë më shumë rëndësi për qytetarët: mundësitë ekonomike, përfshirjen sociale, dhe stabilitetin rajonal.”
Hargreaves shprehu dëshirën e Mbretërisë së Bashkuar që Kosova të jetë në NATO e BE, por shtoi se këto arrihen nëse Kosova ka diplomaci të shkëlqyer aktive dhe fillon me hapa të rinj në procesin e normalizimit të raporteve me Serbinë.
“Disa vende të Ballkanit Perëndimor po shënojnë përparim të mirë drejt hyrjes në BE. Nëse materializohen hapa konkretë drejt paqes në Ukrainë, mund të përshpejtohet edhe progresi drejt anëtarësimit në BE. Mbretëria e Bashkuar gjithashtu do të donte ta shihte Kosovën në NATO – atëherë kur forcat dhe mekanizmat e saj të mbikëqyrjes të përmbushin standardet përkatëse. Në mënyrë që të arrihen këto qëllime, Kosova do të ketë nevojë për diplomaci të shkëlqyer aktive – përfshirë marrjen e vendimeve të vështira – për të arritur këto dy qëllime, duhet filluar me hapa të rinj përpara në procesin e normalizimit me Serbinë.”
Përveç NATO’s e BE’së, Hargreaves ka thënë se Britania e do Kosovën pjesë të Këshillit të Evropës, për cka tha se mund të votohet në çdo moment kur Kosova të bind shtetet anëtare se korniza e saj ligjore mbresëlënëse mbështetet nga një qëllim i vërtetë për të mbrojtur komunitetet joshumicë.
“Kosova duhet të jetë e gatshme të avancojë interesat e saj. Ne në Mbretërinë e Bashkuar e duam Kosovën pjesë të Këshillit të Evropës. Anëtarësimi i Kosovës mund të votohet në çdo moment – kur Kosova ta ketë kryer punën e vështirë për të bindur shtetet anëtare se korniza e saj ligjore mbresëlënëse mbështetet nga një qëllim i vërtetë për të mbrojtur komunitetet joshumicë.”
Hargreaves ka përmendur edhe mbylljen e disa institucioneve në Veri, përfshirë edhe sallën sportive në Mitrovicën e Veriut. Këto veprime sipas tij e minojnë pretendimin se të gjithë qytetarët e Kosovës janë të mirëpritur dhe të lirë të përfaqësohen, të mbrohen e të fuqizohen në Kosovë.
“Veprimet e javëve të fundit në veri të Kosovës u kanë mohuar fëmijëve dhe qytetarëve të zakonshëm nga komuniteti serb në Kosovë qasjen paqësore në shërbime të përditshme, si klubet sportive. Këto veprime minojnë pretendimin e Kosovës se të gjithë qytetarët e saj – pa dallim etnie, gjinie apo përkatësie – janë të mirëpritur dhe të lirë të përfaqësohen, të mbrohen dhe të fuqizohen në Republikën e Kosovës.”
Ai ka thënë se po punojnë ngushtë me Kosovën dhe partnerë tjerë që Samiti i Procesit të Berlinit në vjeshtë të sjellë rezultate konkrete.
“Në vjeshtë, Mbretëria e Bashkuar do të jetë mikpritëse e Samitit të Procesit të Berlinit në Londër. Ky samit do të bashkojë liderët nga i gjithë rajoni për të avancuar qëllime të përbashkëta: rritje ekonomike, bashkëpunim rajonal dhe progres drejt integrimit evropian. E dërguara speciale e Mbretërisë së Bashkuar për Ballkanin Perëndimor, Karen Pierce, po udhëheq përgatitjet për këtë ngjarje të rëndësishme, dhe po punojmë ngushtë me Kosovën dhe partnerët e tjerë për të siguruar që ky samit të sjellë rezultate konkrete.”
Ambasadori Hargreaves ka thënë se Ballkani Perëndimor është rajon me potencial të madh, por që sipas tij po përballet me sfida reale.
“Ballkani Perëndimor është një rajon me potencial të madh – por gjithashtu përballet me sfida reale. Tensionet etnike po ndizen nga retorika përçarëse dhe nga veprimet e aktorëve të jashtëm. Rrjetet kriminale po shfrytëzojnë paqëndrueshmërinë për të nxitur migrimin e parregullt. Korrupsioni vazhdon të minojë sundimin e ligjit. Ndërsa dhuna me bazë gjinore mbetet shkelje e rëndë dhe e përhapur e të drejtave të njeriut. Këto sfida rrezikojnë paqen dhe progresin për të cilat shumë kanë punuar me përkushtim.”
E në trajtimin e sfidave që përmend, Hargreaves thotë se Kosova ka rol kyç. Ai shton se qytetarët e Kosovës meritojnë një qeveri që vepron me vendosmëri në interes të tyre, që i përfaqëson ata në arenën ndërkombëtare dhe që i shtyn përpara reformat që i duhen për integrimin euroatlantik.
“Kosova ka një rol kyç në trajtimin e këtyre sfidave – dhe në formësimin e së ardhmes së rajonit. Por për ta bërë këtë, duhet të jetë politikisht e përgatitur. Kjo është kohë për lidership. Qytetarët e Kosovës meritojnë një qeveri që vepron me vendosmëri në interes të tyre, që i përfaqëson ata në arenën ndërkombëtare dhe që i shtyn përpara reformat që i duhen për integrimin euroatlantik.”
Ai ka thënë se marrëdhënia e re Mbretëri e Bashkuar- BE nënkupton që të dyja palët do të punojnë më ngushtë se kurrë më parë për të mbështetur progresin që sjell përfitime reale për qytetarët e Kosovës dhe të Serbisë, shkruan, Gazeta Express.
“Këtë javë, Kosova do të mirëpresë përfaqësuesen e lartë të BE-së, znj. Kaja Kallas, dhe përfaqësuesin e posaçëm, z. Peter Sorensen. Marrëdhënia e re Mbretëri e Bashkuar-BE nënkupton se të dyja palët do të punojnë më ngushtë se kurrë më parë për të mbështetur progresin që sjell përfitime reale për qytetarët e Kosovës dhe të Serbisë.”
