Pas përmbylljes së procesit të certifikimit të rezultateve nga Komisioni Qendror i Zgjedhjeve dhe thirrjes së seancës konstituive, institucionet duhet të vazhdojnë me formimin e qeverisë, e më pas me zgjedhjen e presidentit të ri, brenda afateve kushtetuese. Kështu ka deklaruar ushtruesja e detyrës së presidentes, Albulena Haxhiu në një prononcim për media pasi ceremonisë së shënimit të pesë vjetorit të Agjencisë për Informim dhe Privatësi.
“Pas konstituimit të Kuvendit, kemi 60 ditë për të zgjedhur presidentin. Por ne, sipas rendit të gjërave, vazhdojmë me votimin e qeverisë e pastaj me çështjen e presidentit”, tha Haxhiu.
Mirëpo, ajo tha se paralelisht duhet të zhvillohen diskutimet politike për të siguruar një proces të qëndrueshëm institucional.
“Ne presim që sa më parë Komisioni Qendror i Zgjedhjeve të certifikojë rezultatet e zgjedhjeve të 7 qershorit. Dhe pas certifikimit të rezultateve të zgjedhjeve, ne kemi konstituimin e Kuvendit. Seanca konstituive duhet të thirret brenda 30 ditëve nga unë si ushtruese e detyrës së presidentes së Republikës së Kosovës. Bazuar në aktgjykimin e Gjykatës Kushtetuese, Kuvendi ka kohë 60 ditë për të zgjedhur presidentin. Mendoj që duhet ta konstituojmë Kuvendin, duhet ta votojmë qeverinë, por në ndërkohë të vazhdojnë takimet për çështjen e presidentit. Kemi thënë që zgjidhja e duhur për këtë çështje është që ta gjejmë një kandidat që nuk është në ndonjë parti politike, pra një emër konsensual. Kosova, Republika jonë ka shumë persona që kanë kontribuar në sfera dhe në fusha të ndryshme. Pra, mendoj që kjo është mënyra më e mirë për të ecur përpara”, tha Haxhiu.
Ajo tha se e rëndësishme është se Qeveria i ka votat. “Pra i kemi më shumë se 61 vota. Prandaj, mund të vazhdojmë me partnerët që i kemi pasur deri më tani. Ata kanë shprehur gatishmërinë që të mbështesin qeverinë Kurti. Sapo të konstituohet Kuvendi, kryetari apo kryetarja e re e Kuvendit, që është njëherësh ushtruese e detyrës së presidentes së vendit, e cakton mandatarin për kryeministër dhe vazhdojmë. Për çështje të tjera që ndërlidhen me negociatat, kjo është në përgjegjësi të kryeministrit Kurti, kryetarit të partisë më të madhe në vend”, shtoi Haxhiu.
Ajo tha se është shumë e rëndësishme që të ketë qasje konstruktive nga partitë opozitare dhe të braktisen praktikat bllokuese, të cilat sipas saj janë ndëshkuar nga ana e qytetarëve të Republikës së Kosovës në zgjedhjet e fundit.
“Qytetarët e Republikës së Kosovës i kanë ndëshkuar partitë politike që bëjnë bllokada, që bëjnë obstruksione, që bojkotojnë institucionet e Republikës së Kosovës, në këtë rast Kuvendin e Republikës së Kosovës. Bojkoti nuk është zgjidhje. Bojkoti është refuzuar nga qytetarët e Republikës së Kosovës edhe në dhjetor, edhe në qershor. Prandaj, le t’i braktisin këto qëndrime bllokuese dhe le të ecim përpara, sepse kemi shumë reforma dhe punë që duhet t’i kryejmë”.
Haxhiu ka thënë se çfarëdo veprimi që i shërben kësaj qasjeje, natyrisht që ata do t’i shtrijnë duart e bashkëpunimit. “Le të jemi seriozë, le të dëshmojmë vullnet, sepse qytetarët e Republikës së Kosovës duan që institucionet të jenë stabile dhe duam që t’i adresojnë të gjitha përgjegjësitë që i kemi dhënë para qytetarëve. Programi që është shpalosur në dhjetor nuk ka mundur që të realizohet pikërisht për shkak të këtyre bllokadave. Kosova edhe për së brendshmi, edhe për së jashtmi ka nevojë për konsultim, ka nevojë për institucione të fuqishme, të forta, që i dalin ballë çfarëdo sfide që mund të kemi në të ardhmen”, nënvizoi u.d.presidentja.
E pyetur nëse do të jetë sërish kandidate për kryetare të Kuvendit të Kosovës, Haxhiu ka thënë se për këtë çështje vendos Lëvizja Vetëvendosje.”Nuk e di, për këtë vendos Vetëvendosja. Ju e dini që grupi më i madh parlamentar, pra subjektit që ka dalë i pari me mbështetjen më të madhe qytetare, i takon që të propozojë kandidatin apo kandidaten për kryetar të Kuvendit”, tha ajo.
