Kryetarja e Kuvendit të Kosovës, Albulena Haxhiu, ka reaguar pas votimit të Qeverisë së re, të udhëhequr nga kryeministri Albin Kurti, përcjell KosovaPost.
Haxhiu ka uruar Kurtin dhe kabinetin e ri qeveritar, duke theksuar se para institucioneve të vendit ka punë për jetësimin e reformave, zhvillimin ekonomik, forcimin e sundimit të ligjit dhe avancimin e pozitës ndërkombëtare të Kosovës.
Ajo ka thënë se Kuvendi do të vazhdojë të ndjekë agjendën legjislative dhe të ushtrojë mbikëqyrjen parlamentare mbi punën e ekzekutivit.
“Me votimet e sotme, Republika e Kosovës tashmë i ka Kuvendin dhe Qeverinë. Mbetet edhe një hap i rëndësishëm për kompletimin e institucioneve e që është zgjedhja e Presidentit të Republikës”, ka shkruar Haxhiu.
Ajo ka bërë thirrje që deputetët ta ushtrojnë përgjegjësinë e tyre kushtetuese dhe që procesi për zgjedhjen e presidentit të përmbyllet me sukses.
“Kosova ka nevojë për institucione të forta, funksionale dhe stabile dhe jo për pritje dhe vonesa të reja”, ka theksuar Haxhiu.
