I dërguari i presidentit amerikan, Donald Trump për Lindjen e Mesme tha të mërkurën se do të jetë pjesë e një ekipi “mbikëqyrësish të jashtëm” të vendosur në dhe përgjatë Rripit të Gazës për të garantuar sigurinë, pas një armëpushimi midis Izraelit dhe militantëve të Hamasit.
Komentet e Steve Witkoff për Fox News duket se ishin konfirmimi i parë publik i përdorimit të planifikuar të inspektorëve të jashtëm në Gaza, duke përfshirë një prani nga zyrtarë amerikanë.
Izraeli dhe Hamasi arritën një marrëveshje shumëfazorejavën e kaluar, për të ndaluar luftimet dhe për të liruar pengjet e mbajtura nga militantët, pas muajsh ndërmjetësimi nga SHBA, Katari dhe Egjipti.
Trump kërkoi një marrëveshje, përpara se të merrte detyrën më 20 janar. Marrëveshja hyri në fuqi më 19 janar.
Witkoff i tha Fox-it se ishte i fokusuar në sigurimin e kalimit të marrëveshjes nga faza fillestare gjashtë-javore në fazën e dytë, e cila ndërmjetësuesit thonë se pritet të përfshijë lirimin e të gjithë pengjeve të mbetur dhe një tërheqje të plotë të ushtarëve izraelitë.
“Unë në fakt do të shkoj në Izrael. Do të jem pjesë e një ekipi inspektimi në korridorin Netzarim dhe gjithashtu në korridorin e Filadelfit,” tha Witkoff.
Netzarim është një rrip lindje-perëndim i Izraelit të pastruar gjatë luftës, që pengon lëvizjen e lirë të palestinezëve midis veriut dhe jugut të Gazës. Filadelfi është një brez i ngushtë kufitar midis Gazës dhe Egjiptit.
“Kjo është vendi ku keni mbikëqyrës të jashtëm, një lloj për t’u siguruar që njerëzit janë të sigurt dhe njerëzit që po hyjnë nuk janë të armatosur dhe askush nuk ka motive të këqija,” shtoi Ëitkoff.
Witkoff nuk tha se kush tjetër mund të jetë pjesë e ekipit të inspektimit. Ministria ushtarake dhe e mbrojtjes e Izraelit nuk iu përgjigj menjëherë kërkesave për koment.
Një burim i njohur me marrëveshjen e armëpushimit, tha se Witkoff pritej të ishte shpesh në Izrael. “Ai synon të jetë këtu dhe të monitorojë, veçanërisht drejt fazës së dytë të marrëveshjes”.
Sipas kushteve të armëpushimit, Izraeli duhet të tërheqë trupat e tij nga Gaza qendrore dhe të lejojë kthimin e palestinezëve në very, gjatë një faze fillestare gjashtë-javore, në të cilën disa pengje do të lirohen në këmbim të lirimit të të burgosurve palestinezë.
Trump tha të hënën se nuk ishte i sigurt në marrëveshjen e armëpushimit dhe e përshkroi Gazën, si një “vend shkatërrimi masiv” pas muajve të bombardimeve izraelite.
Pas arritjes së armëpushimit, Trump tha se ai do të punonte për të zgjeruar Marrëveshjet e Abrahamit, një seri marrëveshjesh të arritura gjatë mandatit të tij të pare, që panë që Izraeli të normalizonte lidhjet me vendet arabe, përfshirë Emiratet e Bashkuara Arabe.
Gjatë intervistës për Fox, Witkoff u pyet se cilat vende në rajon mund t’i bashkohen marrëveshjeve.
“Unë mendoj se ju mund t’i merrni të gjithë në bord në atë rajon. Unë me të vërtetë po. Mendoj se ka një ndjenjë të re udhëheqjeje atje,” tha Witkoff.
I pyetur për të përmendur një vend specifik, Ëitkoff tha: “Dua të them, Katar”.
“Katari ishte jashtëzakonisht i dobishëm në këtë. Sheikh Mohammed (Kryeministri) i Katarit, aftësitë (e tij) komunikuese me Hamasin, ishin të domosdoshme këtu,” tha Witkoff./oranews
