Kancelari i ardhshëm i Gjermanisë, Friedrich Merz, e përshkroi takimin e tij tre-orësh me presidentin francez Emmanuel Macron në Paris të mërkurën si një sukses të madh.
“Ngjashmëritë ishin edhe më të mëdha nga sa prisja”, tha Merz, një Kristian Demokrat (CDU) i qendrës së djathtë, për gazetën Frankfurter Allgemeine në komentet e botuara të enjten, përcjell Telegrafi.
Macron dhe Merz kishin deklaruar të dy synimin e tyre për të hapur një kapitull të ri në marrëdhëniet franko-gjermane pas darkës së tyre të punës në Pallatin Élysée.
Vëzhguesit kishin spekuluar gjerësisht se Macron kishte një marrëdhënie të ftohtë me kancelarin gjerman në largim Olaf Scholz.
Vizita në Paris ishte udhëtimi i parë i Merz jashtë vendit që kur CDU dhe partia e tij simotër bavareze, Unioni Kristian Social (CSU), dolën të parët në zgjedhjet kombëtare të së dielës.
Macron nuk ka folur publikisht për atë që të dy burrat diskutuan në takimin e tyre, por Frankfurter Allgemeine raportoi se shkëmbimi mbuloi të gjitha temat nga mbrojtja tek migrimi dhe politika tregtare dhe ishte jashtëzakonisht konstruktive.
Merz e përshkroi atmosferën e bisedimeve si të përzemërt, të besueshme dhe të frymëzuar nga dëshira e tyre reciproke për të bërë përparim të shpejtë përballë sfidave të mëdha gjeopolitike me të cilat përballen të dyja vendet.
Pas takimit, Merz shkroi në një postim në X në gjermanisht dhe frëngjisht: “Faleminderit, i dashur [Emmanuel Macron], për miqësinë dhe besimin tuaj në marrëdhëniet franko-gjermane. Së bashku, vendet tona mund të arrijnë gjëra të mëdha për Evropën”.
Siç kujtojnë mediat, Merz flet frëngjisht dhe ka një marrëdhënie të ngushtë me Francën.
Si adoleshent, Merz ishte në një program shkëmbimi shkollor në Auvergne dhe ai dhe familja e tij kaluan gjithashtu disa pushime në Francë.
Dhe gjatë kohës së tij në Parlamentin Evropian, thuhet se ai ka mësuar të vlerësojë rëndësinë e marrëdhënieve franko-gjermane.
Takimi i tyre vjen pasi Macron bëri një udhëtim “të nxituar” në Uashington për t’u takuar me presidentin e SHBA-së, Donald Trump, në fillim të kësaj jave, mes alarmit në Evropë lidhur me tërheqjen e garancive të sigurisë nga Trump dhe ndalimin e mbështetjes për Ukrainën në luftën e saj kundër pushtimit të vazhdueshëm rus.
Në një videokonferencë të mëngjesit të së mërkurës, Macron informoi liderët e tjerë të BE-së për bisedimet e tij të fundit me Trump.
Një samit i BE-së i thirrur me nxitim është planifikuar për më 6 mars, në të cilin do të merren vendimet për mbështetjen e mëtejshme për Ukrainën dhe hapat për të forcuar mbrojtjen evropiane.
